Tierra de Miranda

La Tierra de Miranda^[1][2][3] ye un territoriu históricu asitiáu al noroeste de Portugal, na frontera con España y na so mayor parte pobláu polos falantes del mirandés. Tien alrodiu de 700 km² dividíos en 27 freguesíes repartíes ente'l conceyu de Miranda de l Douro, y una pequeña parte de los de Bumioso, Mogadouro y Bergancia.

Na edá del fierro tenemos constancia de la presencia de la tribu ástur de los zoeles al traviés d'altares, tables y esteles. Los romanos conquistaron el territoriu haza'l sieglu I influyendo enormemente na cultura de los habitantes.

Los asentamientos más vieyos conocíos asitiaos na Tierra de Miranda remóntense ente los sieglos V y VI, baxo'l dominiu suevu. Formaría parte del Reinu de Llión hasta un tratu ente Alfonsu I de Portugal y Fonsu VII de Llión nel que pasó a formar parte d'un nuevu reinu peninsular, Portugal. Igualmente siguiría tando baxo'l dominiu del conventu d'Estorga. Nos tiempos de la espansión haza'l sur de los reinos cristianos, llegaron órdenes militares portugueses como foi'l casu de los Templarios de Mogadouro o de los Hospitalarios d'Algoso, asina como los Templarios d'Alcanhiças y los flaire de Moreiruola y de San Martin de Castaneda.

Foron d'especial trescendencia les guerres de los sieglos XVII y XVIII. En 1762, l'exércitu español atravesó la frontera, arrasó'l castiellu y llevó a parte la población como cautiva haza Pamplona. La feria de Samiguel, una de les mayores del norte portugués, celebrada cada añu'l 29 de setiembre nel llocal llamáu Bal de S. Miguel, dexó de facese en Bumioso. Esta feria, qu'atrayía a pertugueses y españoles, pasó a la ciudá de Zamora u güei tovía se realiza.

La Tierra de Miranda vivió un periodu d'aisllamientu hasta 1955, cuando la contrucción del embalse y l'aprovechamientu hidrollétricu del ríu Dueru fizo resurdir a poblaciones como Miranda o Picuote. Nel sieglu XX, tuvieron llugar delles foles migratories que llevaron a gran parte de la población a Brasil (hasta a la década de 1960) y pa Europa (principalmente pa Francia), provocando la desertifición xeneral de les llocalidaes.

El relieve arispiu d'esti territotiu reflexa enforma la dureza del llabor nel campu y de les principales actividaes económiques des les que depende la so población.

Asina, carauterizamos la so morfoloxía pola erosión pliocénica de la meseta norte inferior y pola esistencia de crestes cuarcítiques nel postreru norte y a la vera de la frontera que los axentes erosivos nun algamaron a destruyir a cuenta de la so dureza. Los suelos tán constituyíos principalmente por esquistos y en dellos casos por granitos. Miranda tamién carauterízase polos sos beyos (las arribas), encaxaos y de difícil accesu, que favorez el predominiu de ciertes especies que d'otra forma taríen estintes.

La Tierra de Miranda asítiase nel noreste tresmontanu, aproximao na llatitú 41º 30'N y na llonxitú 6º 17'O. Debío a la so situación xeográfica, el clima d'esta zona ye perparticular, ello produz que los mirandeses carautericenlu citando un sabiu refrán "En Miranda hai nueve meses d'iviernu y tres d'infiernu". L'iviernu en Miranda ye fríu, siendo la temperatura mínima media del mes más fríu de 2 graos 30 díes/añu, inda que la temperatura pue baxar a los 0º C ya inclusive llegar a graos negativos. Per otra parte, el branu ye dafechu opuestu; caliente y secu, siendo la temperatura máxima media del mes más caliente 32º C.

Ver tamién: Parque Natural del Dueru Internacional

No que cinca a la fauna, la Tierra de Miranda poseye una escomanada bayura y diversidá faunística y cinexética. De fechu ye ún de los últimos refuxos de distintes especies animales rares o amenazaes d'estinción, qu'equí alcuentren bones condiciones pa vivir y reproducise. Ente elles destaquen: la cigüeña negra, l'águila real, la utre, nel casu de les aves y la llebre, el xabaril, l'algaire, el raposu o'l llobu ente los mamíferos.

Na flora destaca la presencia de carrasqueos, rebollales, alceos y sufreres nos terrenos más interiores, ente que nes zones de riberes alcontramos salgueros, fresnos, llameres y umeros.

Esti territoriu compónse por 27 llocalidaes o freguesíes:

Abelhanoso Anfainç Anguirra Atanor Augas Bibas Bal de Frailes Bila Chana de Barceosa Bilar Seco Caçarelhos Campu de Bíboras Cicuiro Cunstantin Dues Eigreijas

Malhadas Miranda de l Douro Palaçuolo Paradela Picuote Pruoba Ruolos San Martico de Angueira Sendin Silba Trabanca Uba Zenízio

Habría de sumar dos llocalidaes de cultura asturianollionesa que son:

• Deilon
• Riodonor

Gracies a les sos carauterítiques hestóriques y orográfiques la cultura mirandesa desenrollóse con una cierta independencia a lo llargo de los sieglos, magar que con un claru calter fronterizu.

Na Tierra de Miranda fálase una variedá enmarcada dientro del dominiu asturllionés conocida como mirandés. Los derechos de los falantes (ente 7000 y 15000) tán reconocíos pola llei 7/99, de xineru del añu 1999.

Símbolu de la rica y singular cultura de la Tierra de Miranda son los grupos de pouliteros. Éstos se componen por ocho danzadores y tres músicos (gaita, bombarda y xiblata), el grupu danza faciendo chocar unos palos de 45 cm, d'ehí'l so nome. Créyese que'l so orixe ta nes ancestrales dances guerreres que les tribus ástures prauticaben de manera ritual.

• El 10 de xunetu, a costafecha del día de la ciudá de Miranda, celébrense dellos eventos organizaos pa espardir la cultura mirandesa como son:
  • Festival de la canción mirandesa.
• Feria del llibru mirandés.
• Festival de dances mirandeses.
• Festival de Pouliteiros.
• El 14 de xunetu tien llugar el "die de la lhengua Mirandesa", onde s'homenaxea al idioma cola presencia de pouliteiros, gaites o cantares o recitales tradicionales.
• L'últimu domingu de xunetu tien llugar la fiesta n'honor de Santa Llucía, en Miranda L Douro.

La milenaria adautación de los animales domésticos al paisaxe mirandés orixinó les siguientes races:

• Raza Bovina Mirandesa
• Raza Churra Gallego-Mirandesa
• Raza Asinina Mirandesa
• Perru de Ganáu Tresmontanu

Con al respective del turismu en Miranda podemos atopar:

• Turismu natural: destaquen Miradouros y la Tierra de Miranda, dende onde observar el Dueru.
• Turismu comercial: debío a la cercanía con España y a los precios más baxos. Sicasí, esta actividá tien cada vez menos importancia pola igualación del nivel de vida ente españoles y portugueses, favorecida en parte gracies a l'apertura de les fronteres europees.

• Ethnologue report for Miranda do Douro (Mirandese)
• Partidu de la Lhiberdade de l Praino Mirandés Archiváu 2006-12-16 en Wayback Machine
• Comissão Pró-Autonomia do Nordeste Transmontano