[go: up one dir, main page]
Saltar al conteníu

Johnny Weissmuller

De Wikipedia
Johnny Weissmuller
Vida
Nacimientu Timișoara y Međa (en) Traducir[1], 2 de xunu de 1904[2]
Nacionalidá Bandera de Estaos Xuníos d'América Estaos Xuníos
Bandera de Imperiu austrohúngaru Imperiu austrohúngaru
Llingua materna alemán
Muerte Acapulco de Juárez, 20 de xineru de 1984[2] (79 años)
Causa de la muerte edema pulmonar (es) Traducir
Familia
Casáu con Bobbe Arnst (1931 – div. 1933)
Lupe Vélez (1933 – div. 1939)
valor desconocíu (1939 – div. 1948)
valor desconocíu (1948 – div. 1962)
valor desconocíu (1963 – m. 1984)
Fíos/es Johnny Weissmuller Jr.
Estudios
Estudios Lane Technical College Prep High School (en) Traducir
Llingües falaes inglés[3]
Oficiu
Oficiu actor de cine, nadador, actor, waterpolista, actor de televisión
Altor 191 cm
Premios
IMDb nm0919321
johnnyweissmuller.com
Cambiar los datos en Wikidata

János Weißmüller (2 de xunu de 1904, Timișoara y Međa (en) Traducir – 20 de xineru de 1984, Acapulco de Juárez), más conocíu como Johnny Weissmuller, foi un nadador y actor d'Estaos Xuníos.

Nació na ciudá austrohúngara de Szabadfalu, que güei forma parte de la ciudá de Timișoara en Rumanía, el 2 de xunu de 1904 y morrió n'Acapulco (Méxicu), el 20 de xineru de 1984.

Biografía

[editar | editar la fonte]

Cuando Johnny tenía siete meses la so familia emigró a Estaos Xuníos. Partieron del puertu de Rotterdam nel S.S. Rotterdam, el 14 de xineru de 1905, y llegaron a Nueva York dolce díes más tarde consiguiendo algamar esta nacionalidá. So padre y so madre, Petrus Weißmüller y Erzsebet Kersch, a la llegada a Estaos Xuníos, rexistráronse como Peter, Elizabeth y Johann Weissmuller.

Depués d'una curtia estancia en Chicago, instaláronse nel pueblu de Windber (Pennsylvania), onde'l padre trabayó como mineru.

Llegó a casase un total de cinco veces: cola cantante Bobby Arnst (ente 1931 y 1933), cola actriz Lupe Vélez (ente 1933 y 1939), con Beryl Scott Ginter (ente 1939 y 1948), con Allenne Gates (ente 1948 y 1962 y finalmente con Maria Bauman (dende 1963 hasta la so muerte en 1984).

Cola so tercer muyer, Beryl, tuvo trés fíos, Johnny Scott Weissmuller (o Johnny Weissmuller, Jr., tamién actor) (nacíu'l 23 de setiembre de 1940), Wendy Anne Weissmuller (nacida l'1 de xunu de 1942) y Heidi Elizabeth Weissmuller (31 de xunetu de 1944 - 19 de payares de 1962).

Weissmuller sufrió dos derrames cerebrales ente 1976 y 1978. Nel añu 1979 foi paciente del Motion Picture & Television Country House and Hospital en Woodland Hills (California). Más tarde él y la so última muyer, Maria, cambiaron la so residencia a Acapulco, onde se localizara la so última película de Tarzán. Nesta ciudá morrería d'un edema pulmonar a los 79 años d'edá.

La so carrera como nadador

[editar | editar la fonte]

La so popularidá algamóla primeramente como nadador. Entamó a practicar esti deporte con 15 años, siendo naquella dómina'l so entrenador Big Bill Bagrach. Bien ceo destacó como gran nadador, llegando'l 9 de xunetu de 1922 a batir el récord del mundu de los 100 m llibres con un tiempu de 58'6", baxando asina por primer vez del minutu y de los 400 llibres con 4'57" en 1923, baxando de los cinco minutos.

Participó nos Xuegos Olímpicos de París de 1924 y nos d'Amsterdam de 1928 y consiguió un total de cinco medalles d'oro en 100 y 400 m llibres y 4 x 200 m nos de 1928, batiendo nuevamente les sos propies plusmarques.

Foi precisamente nes Olimpiaes de París onde participó nel tornéu de waterpolo, consiguiendo la medalla de bronce. En tola so carrera algamó 52 veces el puestu de campeón d'Estaos Xuníos, y 67 récords del mundu en metros y yardes en toles distancies comprendíes ente los 100 y los 800 m llibres.

Una de les particularidaes de Johnny Weissmuller yera la de nadar l'estilu llibre cola cabeza fuera del agua, métodu abandonáu dafecho depués.


La so carrera como actor

[editar | editar la fonte]

Depués de la so carrera como nadador, Weissmuller firmó en 1929 un contratu cola empresa BVD pa actuar como modelu y representante. Viaxó a lo llargo del país con espectáculos de natación promocionando ropa deportiva, firmando autógrafos y dando conferencies. Nesi mesmu añu protagoniza la so primer película apareciendo como Adonis na película titulada Glorifying the American Girl.

Pero la so carrera como actor entamó realmente cuando firmó un contratu por siete años cola Metro-Goldwyn-Mayer cola qu'entamó a interpretar el papel de Tarzán en Tarzan the Ape Man (1932). La película tuvo un sonoru ésitu internacional, prestándo-y notablemente al creador del personaxe, Edgar Rice Burroughs.

Weissmuller protagonizó a Tarzán en seis películes entamaes pola MGM cola actriz Maureen O'Sullivan como Jane. Les tres últimes incluyeron a Johnny Sheffield como Boy. Cola compañía RKO, Weissmuller protagonizó seis películes más de Tarzán. Sheffield apaeció como Boy nes primeres cinco rodaes con esos estudios. La nueva compañera yera Brenda Joyce, qu'interpretó a Jane nes cuatro últimes películes que Weissmuller fixo como Tarzán, papel al que-y daría vida nun total de dolce producciones, convirtiéndolu nel actor más conocíu de tolos qu'interpretaron esi papel. Anque nun foi'l primer Tarzán n'apaecer nes pantalles de cine (esi honor foi d'Elmo Lincoln), Weissmuller foi'l primeru al que se-y asocia'l tradicional glayíu.

Cuando finalmente dexó'l papel de Tarzán, darréu vivió otres aventures na xungla interpretando otru personaxe en 1948, "Jungle Jim", colos estudios Columbia Pictures. Fixo trenta películes de Jungle Jim ente 1948 y 1954. L'añu siguiente, apaeció en trés películes de la selva más, interpretándose a sí mesmu. En 1955, Weissmuller foi'l productor de la serie Jungle Jim pa la televisión de la que se rodaron 26 episodios.

Les sos películes foron prohibíes na Alemaña Nazi por mor de los sos oríxenes xudíos.


Filmografía

[editar | editar la fonte]
  • Won Ton Ton, the Dog Who Saved Hollywood (1976)
  • The Phynx (1970) (Cameo)
  • "Jungle Jim" (1955) - (serie de tv) - (Jungle Jim)
  • Devil Goddess (1955) - (Johnny Weissmuller)
  • Jungle Moon Men (1955) - (Johnny Weissmuller)
  • Cannibal Attack (1954) - (Johnny Weissmuller)
  • Jungle Man-Eaters (1954) - (Jungle Jim)
  • Killer Ape (1953) - (Jungle Jim)
  • Valley of Head Hunters (1953) - (Jungle Jim)
  • Savage Mutiny (1953) - (Jungle Jim)
  • Voodoo Tiger (1952) - (Jungle Jim)
  • Jungle Jim In the Forbidden Land (1952) - (Jungle Jim)
  • Jungle Manhunt (1951) - (Jungle Jim)
  • Fury of the Congo (1951) - (Jungle Jim)
  • Jungle Jim in Pygmy Island (1950) - (Jungle Jim)
  • Captive Girl (1950) - (Jungle Jim)
  • Mark of the Gorilla (1950) - (Jungle Jim)
  • The Lost Tribe (1949) - (Jungle Jim)
  • Jungle Jim (1948) - (Jungle Jim)
  • Tarzan and the Mermaids (1948) - (Tarzán)
  • Tarzan and the Huntress (1947) - (Tarzán)
  • Swamp Fire (1946) - (Johnny Duval)
  • Tarzan and the Leopard Woman (1946) - (Tarzán)
  • Tarzan and the Amazons (1945) - (Tarzán)
  • Tarzan Triumphs (1943) - (Tarzán)
  • Tarzan's Desert Mystery (1943) - (Tarzán)
  • Tarzan's New York Adventure (1942) - (Tarzán)
  • Tarzan's Secret Treasure (1941) - (Tarzán)
  • Tarzan Finds a Son! (1939) - (Tarzán)
  • Tarzan Escapes (1936) - (Tarzán)
  • Tarzan and His Mate (1934) - (Tarzán)
  • Tarzan the Ape Man (1932) - (Tarzán)
  • Glorifying the American Girl (1929) - (Adonis)

Referencies

[editar | editar la fonte]
  1. ↑ URL de la referencia: http://arhiva.kurir-info.rs/Arhiva/2004/jun/08/ST-02-08062004.shtml.
  2. ↑ 2,0 2,1 Afirmao en: Gemeinsame Normdatei. Identificador GND: 122935942. Data de consulta: 17 ochobre 2015. Llingua de la obra o nome: alemán. Autor: Biblioteca Nacional d'Alemaña.
  3. ↑ Biblioteca Nacional de Francia. «autoridaes BNF» (francés). Consultáu'l 10 ochobre 2015.

Enllaces esternos

[editar | editar la fonte]
Sacáu de «https://ast.wikipedia.org/w/index.php?title=Johnny_Weissmuller&oldid=4278652»