Dabih

Dabih
	estrella, estrella binaria y estrella doble (es)
Datos d'observación
Ascensión reuta (α)	305,252792 °
Declinación (δ)	−14,781389 °
Constelación	Capricorniu
Tipu espectral	K0:II:+...
Otros nomes
	Ver llista β Cap (Denominación de Bayer); CCDM J20210-1447AB (Catalog of Components of Double and Multiple Stars (en) ); WDS J20210-1447AB (Catálogo de Estrellas Dobles Washington (es) ); 9 Cap (Denominación de Flamsteed (es) );

Coordenaes: 20^h 21^m 0.67^s, -14^° 46^′ 53^″

Dabih (β Capricorni / β Cap / 9 Capricorni) ye la segunda estrella más brillosa na constelación de Capricorniu dempués de Deneb Algedi (δ Capricorni). El so nome, procedente del árabe Sa'd adh-dhabih, significa «la estrella de la suerte del corador». Alcuéntrase a 328 años lluz (101 pársecs) del Sistema Solar y ye una de les estrelles más complexes que se conocen. Con bona vista o usando prismásticos estrémense dos estrelles dixebraes visualmente pocu más de 3 minutos d'arcu, denominaes Dabih Mayor o β¹ Capricorni —la más brillosa—, y Dabih Menor o β² Capricorni —la más tenue—. La distancia ente elles ye de 21.000 UA a lo menos y empleguen siquier 700.000 años en completar la so órbita. Amás, caúna d'estes componentes ye, de la mesma, un sistema estelar múltiple.

Dabih Mayor

Dabih Mayor ye la más complexa de les componentes. La so estrella principal, β Capricorni Aa, ye una xigante naranxa lluminosa de tipu espectral K0II y magnitú aparente +3,08. Con una temperatura efectivo de 4900 K, la so lluminosidá ye equivalente a 600 soles. Tien un diámetru 35 vegaes más grande que'l del Sol y una masa 4 vegaes mayor que la solar. A 0,05 segundos d'arcu d'ella puédese reparar β Capricorni Ab, una estrella blancu-azulada de tipu espectral B8V y magnitú aparente +7,20. La so masa ye bien similar a la de β Capricorni Aa. Dambes estrelles tán dixebraes 5 UA y el so periodu orbital ye de 3,77 años.

De la mesma, β Capricorni Ab tien una compañera bien próxima, a tan solo 0,10 UA, siendo'l periodu orbital d'esta binaria 8,7 díes. Denominada β Capricorni Ac, nada se sabe d'ella. Piénsase qu'igualmente β Capricorni Aa puede ser una estrella múltiple.

Dabih Menor

Dabih Menor ye tamién un sistema binariu. La estrella principal, β Capricorni B, ye una xigante o subxigante de tipu espectral B9.5III/IV y magnitú aparente +6,1. Relluma con una lluminosidá 40 vegaes mayor que la lluminosidá solar. Ye una estrella de mercuriu-manganesu —asemeyada, por casu, a Gienah Gurab (γ Corvi)— con proporciones elevaes de ciertos elementos na so atmósfera. Los niveles de platín, oru, mercuriu y bismutu son 100.000 vegaes más altos que nel Sol.

La componente secundaria de Dabih Minor, llamada β Capricorni C, alcuéntrase a 30 UA de β Capricorni B, magar nun se determinó la so órbita. Probablemente seya una nana mariella de tipu espectral F5V.

Referencies

↑ ^1,0 ^1,1 ^1,2 Afirmao en: SIMBAD.
↑ Afirmao en: Catálogo de Estrellas Dobles Washington.
↑ ^3,0 ^3,1 «The 2001 US Naval Observatory Double Star CD-ROM. I. The Washington Double Star Catalog» (n'inglés). The Astronomical Journal (6): páxs. 3466–3471. avientu 2001. doi:10.1086/323920.

Coordenaes: 20^h 21^m 0.67^s, -14^° 46^′ 53^″

[8ba559d5760a03bedaaacc3c347bbfe4981560bf-1] 1,0 ^1,1 ^1,2 Afirmao en: SIMBAD.

[977ed10f1faf65e31e74ea1a6ef1878eced9edc7-2] Afirmao en: Catálogo de Estrellas Dobles Washington.

[cf2f85b44951e0f97e7eaa7cf45a2ea99fe432ca-3] 3,0 ^3,1 «The 2001 US Naval Observatory Double Star CD-ROM. I. The Washington Double Star Catalog» (n'inglés). The Astronomical Journal (6): páxs. 3466–3471. avientu 2001. doi:10.1086/323920.

[1]

[2]

[3]