[go: up one dir, main page]
Saltar al conteníu

Cinturón del Maíz

De Wikipedia
Producción de granu de maíz (en bushels) n'Estaos Xuníos, dixebrada por condaos (2018). La mancha verde escuru amuesa la concentración de la producción nos estaos del Cinturón del Maíz.

El Cinturón del Maíz (n'inglés: Corn Belt) ye una rexón del Mediu Oeste d'Estaos Xuníos que, de magar la década de 1850, tien dominao la producción de maíz del país. De forma xeneral úsase'l conceptu de Cinturón del Maíz pa denomar l'área del Mediu Oeste na que l'actividá agraria ye'l sector económicu dominante[1][2].

Xeografía

[editar | editar la fonte]

Nun hai un consensu claru sobro cuálos territorios son los que formen el Cinturón del Maíz, magar qu'avecen a incluyise nelli: Iowa, Illinois, Indiana, el sur de Michigan, l'oeste d'Ohio, l'este de Nebraska, l'este de Kansas, el sur de Minnesota y parte del estáu de Missouri[3]. Delles veces incorpórense a elli tamién Dakota del Norte, Dakota del Sur, tol territoriu d'Ohio y Michigan, Wisconsin y Kentucky[4]. La rexón caracterízase por tener terrenu llanu, con suelos profundos y fértiles ricos en materia orgánico y nitróxenu. El clima, con díes caldios, noches templaes y lluvia repartida a lo llargo de la temporada de medría del maíz, ye l'ideal pal cultivu d'esti cereal[5].

En 2008 más de la metá del maíz cultiváu nos Estaos Xuníos plantose en cuatru estaos: Iowa, Illinois, Nebraska y Minnesota[6].

Historia

[editar | editar la fonte]

De resultes de los socesivos desarrollos tecnolóxicos esperimentaos pola agricultura ente 1860 y 1970 el Cinturón del Maíz foi camudando el so calter de territoriu dedicáu al cultivu de diversos cereales y a la ganadería a territoriu dedicáu, cuasi esclusivamente al cultivu del maíz. De magar 1970 la medría de la producción de cereal y carne obligó a buscar mercaos nel estranxeru, pero la recesión global y la fuercia del dólar amenorgaron les esportaciones, causando problemes inclusive a los granxeros que meyor xestionaben les sos plantaciones[3].

En 1956 l'antiguu vicepresidente Henry A. Wallace, un pioneru na introducción del maíz híbridu (que yera'l 99% del total tan ceo como 1950), declaró que nel Cinturón del Maíz desarrollárase "la civilización agrícola más productiva que'l mundu viera enxamás"[7]. Anguaño el país, especialmente nos estaos del Cinturón, produz el 40% del total mundial d'esi cultivu[8].

La mayoría del maíz plantáu anguaño dedícase a cebar el ganáu, especialmente a gochos y aves de corral (pitos, pavos). Nes caberes décades tien ganao importancia nel Cinturón el cultivu de soya.

Referencies

[editar | editar la fonte]
  1. ↑ Hansen JM, Gaining access: Congress and the farm lobby, 1919-1991, p. 138. University of Chicago Press, 1991. ISBN: 978-0-22631-5560.
  2. ↑ McIlwraith TF, Muller EK, North America: the historical geography of a changing continent , p.186. Rowman & Littlefield Publishers, 2001. ISBN: 978-0-742500198.
  3. ↑ 3,0 3,1 Hart, JF, "Change in the Corn Belt". Geographical Review, 1986;76(1):51–72.
  4. ↑ National Agricultural Statistics Service, na web del Ministeriu d'Agricultura d'Estaos Xuníos.
  5. ↑ Corn Belt, entrada na Enciclopedia Británica online.
  6. ↑ ERS State Fact Sheets, na web del Ministeriu d'Agricultura d'Estaos Xuníos.
  7. ↑ Schapsmeier EL, Schapsmeier FH, Prophet in Politics: Henry A. Wallace and the War Years, 1940-1965, p. 234. Iowa State University Press, 1970.
  8. ↑ Wayne Smith C, Betrán J, Runge ECA (ed.), Corn: Origin, History, Technology, and Production, p. 4. Hoboken, John Wiley, 2004.
Sacáu de «https://ast.wikipedia.org/w/index.php?title=Cinturón_del_Maíz&oldid=3990682»