Arte paleocristianu

Denomínase arte paleocristianu al estilu d'arte qu'esiste nos seis primeros sieglos de la nuesa era a consecuencia del surdimientu ya espardimientu del cristianismu. Si bien empieza siendo un arte marcadamente funerariu que se desarrolla al principiu con ircertidume, poco a poco va afianzándose hasta convertise na ponte que xune la cultura clásica y la cristiana.

Dende'l puntu de vista cronolóxicu desenvuélvese nos cinco primeros sieglos de la nuesa era, distinguiéndose dos etapes separaes pol Edictu de Milán (313), nel cual se reconoz la llibertá de cultu a los cristianos.

Nesta primer etapa, anterior al Edictu de Milán, la Ilesia nun tien llibertá de cultu. Roma, que se caracterizara pola so tolerancia en materia de relixón, termina por nun aceptar al cristianismu a causa de les marcaes diferencies ente los cristianos y los paganos. El monoteísmu de los primeros al empar que'l so celu proselitista, el refugu haza otres creencies y la so negativa a rindir cultu al emperador van ser les principales causes del enfrentamientu. Sicasí, los cuatro primeros emperaores (Augustu, Tiberiu, Calígula y Claudiu) permiten l'espardimientu del cristianismu al nun observase tovía en riesgu la integridá del Imperiu. Siendo emperador Nerón entama la primer persecución de les diez que van sufrir los cristianos dende'l sieglu I al IV.

Les persecuciones y la necesidá que tienen los cristianos de reunise en determinados llugares para poder prauticar el cultu ensin ser descubiertos, llévalos a utilizar les cases particulares. Dende'l principiu del sieglu III dalgunes son adautaes a les necesidaes de les congregaciones cristianes. Nelles tienen llugar les reuniones dominicales (sinaxis) cola celebración de la Eucaristía, amás de la llectura de los Evanxelios y de les Epístoles, el sermón y el rezu en común de les oraciones. Esti tipu d'edificiu llamóse domus ecclesiae, un llugar de reunión y de cultu nel que yera indispensable un comedor, polo que nel tricliniu de la casa romana viose la estancia que reunía les condiciones más oportunes pa tales reuniones.

En Dura Europos (Siria), una ciudá que funda Alexandru Magnu a la vera del Éufrates, pue atopase’l más antiguu exemplu. Del sieglu III, consta como cualquier casa griega d'un peristilu o patiu de columnes, con habitaciones de tamaños distintos.La que se destina como bautisteriu ye rectangular con techu de madera y una pila adosao a una de les parés. Les pintures, mal conservaes, representen a Adán ya Eva nel Paraísu, al Bon pastor, a David matando a Goliat, a San Pedro caminando sobre les agües y la curación del paralíticu por Xesús.

Otra construcción d'ésta domina ye’l martyrium, de planta central, que sirvía pa guardar la tumba d'ún mártir o recordaba’l so martiriu. Recuerda a otres construcciones paganes (heroa) n’honor a dellos héroes.

Los cristianos nun aceptaben la cremación de los cadabres, yá qu'ellos prauticaben la inhumación. Nesti sen, y teniendo en cuenta que nun queríen ser enterrados cerca de los sepulcros paganos, nun principiu utilizaron los xardinos privaos de les viviendes de dellos fieles, pero a midida que foi creciendo la comunidaá cristiana estos espacios foron insuficientes, polo qu'a fines del sieglu II y principios del III adquirieron terrenos nes afueres de Roma, siendo esti l'orixe de les catacumbes, que van dexar d'utilizase a fines del sieglu V y comienzos del VI.

Estos cementerios soterraños son de grandes dimensiones, llegando a tener dalgún hasta cinco galeríes. Col tiempu van abandonase como consecuencia de les guerres ya les invasiones, pero’l descubrimientu casual d'una de les catacumbes de la Via Salaria nel sieglu XVI espierta de nueves l'interés. Nestes catacumbes escávense delles galeríes (ambulacra) nes que se van abrir en sentíu llonxitudinal unes cavidaes rectangulares (loculi) -onde se van depositar los cadabres- que llueu se zarren con llábanes de mármole o ladriyu; ellí u se crucien delles galeríes (cubicula) hai un nichu semicircular (arcosolium) nel que descansa’l cuerpu de dalgún martir.

Ye en Roma u se puen atopar les catacumbes más importantes; ente elles hai que destacar les de San Calixto, San Sebastián, Domitila, Santa Inés y Priscila, anque esisten otres en Nápoles, Sicilia y nel norte d'África.

La cella memoriae ye una capiella construyía al aire llibre encima de les catacumbes. Yera un edificiu de pequeñes dimensiones con planta cuadrada o trilobulada onde -cuando hebo mayor tolerancia pa colos cristianos- se celebraben los actos del cultu. Sicasí, y a consecuencia del reconocimientu de la llibertá de cultu a los cristianos col Edictu de Milán (313), estes construcciones nun llegaron a espardese por culpa de la edificación de grandes basíliques.

Ente los motivos simbólicos más comunes podemos ver el crismón o monograma de Cristo, formáu poles dos primeres lletres entrellacies del so nome en griegu, X-P, al que más tarde s’añaden a los llaos la primer y última lletra del alfabetu griegu (alfa-omega) pa simbolizar el principiu-fin de toles coses. La vide representa el sangre de Xesús; el pexe fai referencia tamién al nome de Cristo, pues la pallabra griega IXZUS, que significa pexe, contién les cinco primeres lletres de la fras Iesos Christos Theou Uios Soter (Xesús Cristo fíu de Dios Salvador).

Otros símbolos emplegaos son el pavu real, l'ancla y la palomba. El primeru ye símbolu de la inmortalidá, yá que se pensaba que la so carne nun yera corrompible; l'ancla significa la esperanza del cristianismu y, de cuando en vez, va en compaña d'ún delfín, amigu del home; la palomba llevando nel picu una rama d'olivar fai referencia a la lliberación. Tamién se representaron temas d'orixe paganu; la nueva relixón dio-yos un conteníu cristianu, colo que se produz la fusión ente les fontes bíbliques ya les paganes. Nesti sen, determinaos mitos foron incorporaos a la iconografía cristiana, polo qu'Orfeo pasó a ser la personificación de Xesús cuando desciende al llimbu, al tiempu qu'Eros ya Siquis faen referencia a l'alma xunida a Dios nel amor. Aristeu, fíu d'Apolu y de la ninfa Cirene, dios y patrón de l'agricultura, de la ganadería y de la caza, conviértese nel Bon Pastor, y represéntase llevando una oveya al llombu como símbolu de l'alma. Dacuando esta figura asóciase tamién a la de la Orante, una moza colos brazos abiertos n’actitú d'orar, que representa l'alma lliberao del cuerpu y gozando del Paraísu. Per otru llau, los amorinos pastores ya vendimiadores que decoraben les cases de Pompeya pasaron a ser símbolu del Paraísu ya la Eucaristía, al empar que les guirlandes simbóliques de la inmortalidá; esto ye: determinaos temes decorativos paganos adquirieron nel arte paleocristianu un sentíu místicu.

Depués de 313 van surdir otros temes iconográficos, ensin qu'esto signifique la desapaición de les antigües imáxenes de les catacumbes. Pero va dexándose de llau l'ideal clásicu y gana importancia la espresivá de les formes. Nesti sen destaca la rellación cola iconografía imperial de Cristo dando la Llei (traditio Legis) o nel tronu colos apóstoles. Surde asina la forma de Cristo en Maxestá, que va tener gran repercusión nel arte medieval.

Los emperadores del Imperiu Romanu d'Occidente ya Oriente, Constantinu (306-337) y Liciniu (308-324) redacten en Milán nel añu 313 un edictu nel que se concede la llibertá d'espresión a toles relixones, ente elles ya sobre manera al cristianusmu, que l'emperador Teodosiu (379-395) va declarar relixón oficial del Estáu nel añu 380 (Edictu de Tesalónica). Pero ye dende l'Edictu de Milán cuando se plantega la necesidá d'una arquiteutura propiamente cristiana especializada, que ye la que va poner les bases de la posterior.

La ilesia, pallabra d'orixe griegu (ecclesia) que significa “asamblea”, ye’l llugar d'aconceyamientu de tolos fieles, a diferencia del templu paganu, que nun tien esa finalidá, y d'ehí los diferentes plantegamientos arquiteutónicos. A causa del caráuter congregacional d'esta relixón precísase d'un edificu zarráu que seya quién a albergar un gran númberu de creyentes, polo que d'ente los edificios públicos romanos vese na basílica’l meyor modelu a siguir.

El cuerpu principal de la construcción va precedíu d'un atrium, patiu cuadrangular y porticáu deriváu del que yá esiste na arquiteutura doméstico, con una fonte o cantharus nel centru, dando pasu asina al templu a traviés del narthex, nave tresversal pa los catecúmenos. La basílica, que mira pal este, solía ser de trés naves -anque les más importantes teníen cinco-, siendo la central el doble d'ancho que les llaterales, y tamién de mayor altura, polo que nella podíen abrise unes ventanes. Les naves separábense con columnes xuníes con arquitrabes o arcades. En dalgún casu sobre les naves llaterales llevántense unes tribunes destinaes a les muyeres (matroneum). La nave central terminaba nun arcu triunfal abiertu a la nave tresversal del cruceru o transeptum. A traviés d'unes grades llegábase al presbiteriu o cabecera, la parte más importante de la basílica, de planta semicircular, con un altar nel centru cubiertu con baldaquín. Namás s’abovedaba l'ábside, quedando les naves con una cubierta de madera con casetones. Los fieles ocupaben les naves llaterales, quedando les muyeres nel llau derechu y los homes nel izquierdu.

El sofitu del emperador Constantinu a os cristianos trai consigo la construcción de dellos templos. Aparte de la basílica de San Xuan de Lletrán, orixe de les demás ilesies cristianes, l'otru gran templu constantinianu de Roma foi la basílica de San Pedro, que s’edifica ente los años 319-322 na colina del Vaticanu, y que desapaez cola construcción de l'actual basílica.

Ente los edificios de planta central figuren el bautisteriu y el mausoléu. El primeru formaba parte de la basílica, anque yera una construcción independiente d'ella. Inspiráu nos ninfeos o baños de los palacios romanos ye de planta central y, por regla xeneral, octogonal. Nel centru quedaba una pila de grandes dimensiones u se podía celebrar el bautismu por inmersión de los adultos. De tiempos de Constantinu ye’l de San Xuan de Lletrán, en Roma, construyíu nel añu 315. Ye destacable tamién el bautisteriu de los Ortodoxos en Rávena.

Los mausoleos son edificios de caráuter funerariu de planta central. Son destacables el de Santa Constanza, del añu 350, y el de Gala Placidia, del sieglu V, dedicáu a San Llorenzo.

Anque los sarcófagos decorados con temes paganos ya significáu cristianu apaecen pronto, sin embargu los más interesantes y yá con escenes cristianes del Antiguu y del Nuevu Testamentu son posteriores a la Paz de la Ilesia, del sieglu IV y de parte del V. Solíen ser prefabricados, colos rasgos de los difuntos a medio esbozar y nel interior d'un medayón circular o clipeum (imago clipeata qu'en dellos casos se sustituyía con una cascariella) nel centru de la cara anterior del sarcófagu. Al ser adquiríu esti yera cuando se terminaba’l retratu del difuntu. En xeneral namás quedaben llabraos trés de los frentes, quedando’l cuartu ensin relieves por dir a quedar contra la parede.

N’otros casos los relieves apaecen nún únicu frisu o nun frisu doble, anque también esisten sarcófagos de columnes, con frontones y arcos alternados que sirven de separación a les diferentes escenes (en dellos casos tamién se pueden ver árboles sustituyendo a les columnes). Igualmente hai sarcófagos tallaos con estríxiles, motivu ornamental esti a base d'acanalaures ondulaes (Sarcófagu de Baebia Hertofila, Muséu de les Termes, Roma, sieglu III), nos que les partes con relieve queden reducíes al centru ya a los estremos. Del sieglu IV son el sarcófagu llamáu Dogmáticu y el de los Dos Hermanos, dambos nel Muséu P. Cristiano (Roma), y el de Junius Bassus, na cripta del Vaticanu. Nesti podemos ver cómo les escenes apaecen en dos frisos con columnes, arquitrabes, arcos y frontones alternados: nel frisu superior vemos el sacrificiu d'Isaac, la detención de San Pedro, a Xesús ente Pedro y Pablo y llueu énte Pilatos; nel frisu inferior podemos ver la miseria de Job, a Adán y Eva llueu de cometer el pecáu, a Xesús entrando en Xerusalén, a Daniel na cueva los lleones y a San Pablo siendo conducíu al martiríu.

El mosaicu ye una téunica romano-helenístico que consiste na yustaposición de teseles de diversos colores sobre un fondu de cementu.

Nel mausoléu de Santa Constanza (Roma), del sieglu IV, perdiéronse los mosaicos de la cúpula –con escenes del Antiguu y del Nuevu Testamentu-, pero consérvense bien los de la bóveda de cañón que cubre la nave anular con motivos florales, xeométricos ya figurativos de tradición profana. De gran plasticidá ya dinamismu, d'ente ellos destaquen unos putti vendimiadores de fuerte coloríu sobre fondu blancu, asemeyaos a los que se puen ver en dellos sarcófagos.

El mausoléu de Gala Placidia y el bautisteriu de los Ortodoxos, dambos en Rávena y del sieglu v, tán igualmente cubiertos de mosaicos. Nel centru de la cúpula del mausuléu de Gala Placidia represéntase la cruz sobre un fondu azul con estrelles y el Tetramorfos (símbolos de los evanxelistas). Nos llunetos destaquen el Bon Pastor cola cruz, San Llorenzo camín del martiriu y la representación d'unos ciervos que busquen la fonte de la vida eterno, too ello con un fondu azul con guirlandes decoratives, frutes, flores y motivos xeométricos.

• Grabar, A., Las vías de la creación de la iconografía cristiana. Alianza Editoria, Madrid, 1985
• Krautheimer, R. Arquiteutura paleocristiana y bizantina. Cátedra, Madrid, 1984
• Vv. Aa., Historia del Arte de la Antigua Edad Media. Editorial Universitaria Ramón Areces
• Bianchi Bandinelli, R. Del Helenismo a la Edad Media. Akal, Madrid, 1941

• Wikimedia Commons acueye conteníu multimedia sobre Arte paleocristianu.