Mecha (robó)
Un mecha (abreviación del inglés mechanic o mechanical, pronunciáu "meca") ye xeneralmente un robó humanoide de proporciones descomanaes y diseñáu como armamentu militar. Los meches son comunes en subxéneros de ciencia ficción modernos y de mena granible nel manga y anime (historietes y animación xaponeses), d'onde remanez el so nome.
Delles series d'anime populares inspiraes en meches inclúin Mazinger, Gundam, Robotech y Evangelion. Nesta cabera, los meches (nomaos "EVA") nun son mecánicos sinón biolóxicos, anque la so traza y propiedaes son les de robós pergrandes. En series d'anime d'hai poco surden meches n'escenarios arodiaos de maxa (n'oposición a los clásicos escenarios futuristes y post-apocalípticos como Geneshaft). Exemplos d'estes series son Escaflowne y Magic Knight Rayearth.
Otres variedaes de meches presenten robós con formes d'animales (incluyendo dellos desaniciaos, como dinosaurios), robots con dos o más tresformaciones (xeneralmente alternando ente una forma humanoide y la d'una máquina o vehículu) y meches "fusionables", onde una variedá de meches relativamente pequeños s'unen pa ensamblar ún mayor.
Los meches son davezu pilotaos dende una cabina de control asitiada nel interior de la tiesta o'l torsu nel casu de los meches pergrandes (Mazinger, Evangelion). Otra variedá de meches más pequeños, conocida como "powered armor", nun ye más qu'un traxe mecánicu-lletrónicu (o máxicu en dellos casos), a mou d'exoesqueletu, que-y apurre facultaes sobrehumanes y proteición al so pilotu o portador, como se ve nidiamente en Gasaraki, Bubblegum Crisis). Esta cabera variedá ye más común nel cómic americanu, anque s'alcuentra tamién presente en delles series d'anime.
El pilotu d'un mecha ye estereotípicamente un xoven valiente y talentosu (en dellos casos dotáu). Na mayoría de les series d'anime onde se presenten meches, estos son consideraos teunoloxía armamentista de cabera xeneración y suelen ser comandaos por pequeñes élites de pilotos altamente entrenaos. N'ocasiones el protagonista d'una serie d'estes carauterístiques sofre un alcuentru accidental col so mecha, pero algama dominalu en curtiu tiempu, superando inclusive a personal militar capacitáu.