Crocus sativus

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Crocus sativus
Zafrán (Crocus sativus).
Clasificación scientifica
Dominio: Eukaryota Reino: Plantae División: Magnoliophyta Clase: Liliopsida Orden: Iridaceae Familia: Iridaceae Chenero: ''Crocus'' Subchenero: ''C. sativus''
Nomenclatura binominal
''Crocus sativus''
L.

Lo zafrán^[1] ye una especia derivata de la flor de la planta de lo mesmo nombre (Crocus sativus), una especie de lo chenero Crocus drentro de la familia Iridaceae.

Lo zafrán se caracteriza por o suyo sabor amarga y lo suyo aroma; estos dimanan de los suyos componens quemicos picrocrocin y safranal. Tamién contién un tinte de tipo carotenoide dito crocin, que da a lo minchar un color amariello dorato. Esto fa de lo zafrán un component apreciato en muitos platos en tot lo mundo. En Espanya s'emplega como component indispensable de la paellas, tamién s'emplega en la confección de roces, carnes y mariscos. Lo zafrán tien tamién aplicacions en medicina. Lo zafrán plega ta prés altos porque lo suyo cautivo, recolección y manipulación ye muito delicato. Por la suya alta valura economica s'ha denominato oro royo y ha estato obchecto de muitas adulteracions y falsificacions aproveitando lo suyo nombre y valura.

Lo zafrán constituito por los estigmas, unitos u no a lo estilo de la flor de lo Crocus sativus Lin., ye una especia cuyo mercato mundial ha estato y ye liderata por Espanya no nomás a nivel de producción, también a nivel d'exportación. La fuella de Zafrán se diz tradicionalment en castellano d'Aragón espartín u cerdas y las flors rosas del azafrán.

Lo nombre ye prou pareixito en muitas luengas, y un posible orichen ye lo francés antigo safran, que deriva de lo latín safranum. En aragonés ha puesto plegar a traviés de l'arabe زعفران , con paso d'a zāi sonora ta z, ç africata alveolar y dimpués interdental como en atros arabismos equivalents como "roz".

Existen referencias de lo zafrán que datan de l'anyo 2300 aC. A partir d'esta fecha son variatas y diferents las referencias sobre lo suyo uso en ritos y cerimonias relichiosas, en medicina, en la gastronomía, ecetra.

Segunt las investigacions de los echiptologos, ya s'usaba muito en l'antigo Echipto. En los Cantos de Salomón se mencionaba ya lo nombre de Karkom, como uno de los productos mas afalagatos de lo reino vechetal. Con esta palabra, procedente talment de la India, ye relacionato lo nombre griego Krokos y lo latín Crocum (Crocus de los poetas).

En la literatura griega y romana se cita a sobén, y lo que se'n diz contrimuestra l'important papel que la color y la olor de lo zafrán tenioron en la vida refinata de la antigüedat clasica. S'ha usato a sobén como tinte (colorant). Se tenyiban con zafrán los vestitos de fiesta y s'estendeba zafrán por lo suelo de las salas on se celebraban festins y se replenaban con zafrán los coixins.

Una definitiva identificación de lo zafrán data de 1.700-1.600 aC en una pintura en lo palacio de Minos en Knossos, en Creta. Atro fresco data de 1.500 aC y presenta a una choven cullindo zafrán ceremoniosament, s'ha descubierto fa poco en Akrotiri en la isla de Thera. Lo zafrán se culle picando la flor entera en Minos mientres que las chovenas de Thera picán nomás que los estigmas dreitament.

Mes tarde lo zafrán ye mencionato en la Biblia, en la Ilíada y en lo sieglo V aC en lo rechistro Kashonini. En lo sieglo IV aC la principal aria de cautivo yera en Corycos en Cilicia, en las costas mediterranias de Turquía y en Anglaterra.

En Echipto sobre lo 1000 aC lo zafrán podió estar usato en embalsamientos u mes tarde de cuan en cuan pa colorant de mortallas on las momias yeran cubiertas, amariello las femellas y royo los masclos. Lo zafrán yera un important colorant en la Grecia antiga y en Roma yera usato para coloreyar la ropa de matrimonio. En atro tiempo los romanos lo usoron como tintes para lo pelo.

Los griegos lo consideraban como un perfume sensual. S'estendeba en los vestibulos, patios, y teatros griegos y en banyos romanos; ruixioron las carreras de Roma con un zafrán cuan Nerón entró en la ciudat.

Lo zafrán tenió muita importancia en lo comercio. Comercialment contina estando un articlo important (especialment en Espanya). En la Edat Meya lo principal centro de comercio de lo zafrán yera Venecia y los compradors principals yeran los alemans. Triballadors especials que formaban parte de l'Ufficio dello Zafferano y iban armatos, s'encargaban de la inspección de los comercians de zafrán y d'evitar que lo falsificasen. La importancia de lo comercio de lo zafrán en Alemanya se deduce ya de lo feito que en 1448 se rechistró en Verona una partita de zafrán destinata a Alemanya evaluata en 10.000 ducatos.

En Anglaterra lo zafrán se negociaba en octubre. La tentación comercial pareix tener superatos los escruplos de bels comerciants y yera conoixita l'adulteración, no se sape si por la fibra de carne de caballo, con trozos de pelleta de cebolla u tiza coloreyata; las penas con culpabilidat yeran severas.

Lo cautivo de lo zafrán pareix haber-se extendito dende Orient ta Occident. Teofrasto considera muito bueno lo zafrán de Cirene y superior a lo de Grecia.

Virchilio canta a lo zafrán de los monts de Tmolus de Lidia, Barron, Dioscorides. Columella y Plinio lo Viello citan atras zonas, especialment d'Asia la Chica, que proporcionaban lo millor zafrán.

A mitat de lo sieglo X se cautiva esta planta en Espanya, on probablement la introducioron los arabes. Lo consumo de lo zafrán augmentó continuament en la Edat Meya estendillando-se a por la Europa cristiana dica Anglaterra.

Huei lo zafrán se cautiva en tot l'Orient, en los países de la Europa d'o sud, en Suiza, en lo Tirol, en la baixa Austria, en Anglaterra y en Pensilvania.

En Francia contina huei tenendo importancia este cautivo en lo Loiret, estando Pithiviers un gran centro de lo comercio de zafrán. Antigament lo comercio de lo zafrán lo levaban mercaders de las ciudaz medievals, que realizaban estas trasaccions en las ferias anuals de las comarcas zafraneras y en los mercatos urbans. Tamién lo levaban las botigas d'especiería mas u menos a man d'ixos. Las botigas gosaban estar agrupatas en antigos vicos gremials de la población.

En la Baixa Edat Meya se cautivaba dende Daroca dica lo Matarranya, on yeran presents comerciants alemans que lo compraban. Se pagaba a lo peso mes caro que l'oro. La riqueza monumental de lo Baixo Aragón en arte gotico s'explica por este feito.

En Aragón lo cautivo de lo zafrán tenió una gran importancia en los sieglos XVI y XVII. S'estendeba por amplas zonas de lo reino: enta lo norte la muga se trobaba en lo semontano pirenenco y los pueblos de la Ribera de la Cinca tamién conoixioron lo suyo cautivo, estando Balbastro lo nuclio on se comercializaba la producción.

En bels lugars de los Monegros teneba gran importancia, dica lo punto d'estar lo mas recurso mes important. Cock, un viachero que recorreba las tierras aragonesas a fins de lo sieglo XVI, comentaba que los vecins de los lugars monegrins minchaban zafrán en gran cantidat y que este yera lo suyo principal medio de vida.

Lo zafrán yera uno de los productos que mes importancia heba tenito en las exportacions, encara que como consecuencia d'una serie de falsificacions, en la Edat Moderna perdió importancia en lo mercato francés, que en bels sieglos anteriors heba estato uno de los principals clients d'este producto. Uno de los medios proposatos en lo sieglo XVII por l'arbitrista aragonés Antonio Cubero pa reviscolar lo comercio de lo zafrán estió la exportación ta America, on se cotizaba a pres muito altos. Lo que se proposó no se fació y l'aria de cautivo de lo zafrán se fació cada vegata menor.

Encara en la decada de los anyos hueitanta la producción de zafrán en Teruel y Zaragoza representaba lo 25 % de la producción espanyola. Las zonas productoras yeran:

• Zona de Mont-reyal: con Mont-reyal, Torrillo, Camín Reyal y Cingla.
• Zona de Muniesa: Muniesa, Loscos, Lecera, Moyuela, Mont-fort, Uesa, y Corz d'Aragón.
• Zona de Campo Bello: Bello, Las Cuerlas, Odón y Gallocanta.
• Zona de Campo Visiedo: Visiedo, Lidón, Archent, Escoriuela, Camanyas.

Las millors calidaz yeran las de la zona de Mont-reyal, on la mayoría de lo zafrán yera de la clase río. En la zona de Muniesa la calidat yera inferior, por la traza de secar-lo, sin cuasi emplegar fuego, y yera de la clase sierra.

• Se veigan as imáchens de Commons sobre Zafrán.