Pueblos turquicos

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Os pueblos turquicos son un conchunto de pueblos d'Asia Central, Siberia, Orient Meyo y Europa Oriental que parlan luengas turquicas como reflexo d'un común orichen d'as suyas clases dirichents en o norte d'Asia Central. Por o menos dende l'Alta Edat Meya uns pueblos turquicos con modo de vida propio de pastors nomadas u seminomadas encomenzoron un proceso migratorio que los levó ir ocupando as estepas d'Asia Central (que pasoron a denominar-se Turquestén), arribando tamién en Orient Meyo, proceso que s'acceleró con a formación de l'Imperio Mongol. A mayor part d'os pueblos turquicos se convirtioron a la relichión musulmana como consecuencia d'o suyo proceso migratorio ta zonas d'influencia musulmana.

Os pueblos turquicos desfacioron o modo de vida sedentario de determinatas zonas que ocupaban como Anatolia u se constuyoron en clase dirichent de pueblos sedentarios en atras zonas como en Persia u Transoxiana, a los qui asimiloron. Os pueblos turquicos han formato estaus con gran importancia cheopolitica como l'Imperio Otomán. Actualment os pueblos turquicos son mayoritarios en Turquía, Azerbaichán, Turkmenistán, Uzbekistán, Kazaquistán y Kirguizistán, y fan una part important d'a población de determinatas rechions de Rusia, China, Afganistán u Irán.

A luenga turquica mes diverchent d'o conchunto ye o chuvaix. As atras luengas turquicas presentan menor distancia entre ellas que as luengas eslavas u as luengas neolatinas como consecuencia d'un proceso de formación y deseparación mes recient. Abundan as parlas de transición entre diferents luengas turquicas.

A relichión orichinal d'os pueblos turquicos ye o tengrianismo, culto a lo dios celeste Tengri.

Os pueblos turquicos se convirtioron a diferents relichions (budismo, maniqueísmo, cristianismo nestorín, cristianismo ortodoxo), pero a mayoría remató convertindo-se a la relichión musulmana.