Luengas caucasicas

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

La denominación luengas caucasicas (millor clamatas talmén luengas d'o Caucas) abraca per un regular lo conchunto altament heterochenio de familias lingüisticas charratas en a rechión d'o Caucas, en o brazo que achunta la Europa de l'Este y l'Asia occidental entre lo Mar Negro y lo Mar Caspio. Los estudios lingüisticos que s'han feito sobre istos idiomas amuestran que las relacions y afinidaz entre élls son chicotas y no guaire claras.

La mayoría d'os idiomas de l'aria d'o Caucas se distribuyen entre tres filos prou acceptatos, la relación d'os cuals podría explicar-se seguntes bels lingüistas per lo contacto cheografico-historico, y que sería la razón d'a etiqueta cheneralista de luengas caucasicas. Ixos tres filos u macrofamilias son:

• lo surcaucasico u kartulián, que inclui lo principal idioma caucasico, lo cheorchiano, luenga oficial a Cheorchia que tien uns cuatre millons de parladors;
• lo norcaucasico occidental, tamién dito pontico, circasián u abkhasio-adigueu, la luenga mes charrata d'o cual ye la kabardiana, con un millón de parladors;
• lo norcaucasico oriental, tamién dito caspián u nakh-daguestaní, que conta con un numbro mes gran de luengas, d'entre las cuals lo chechén, con un millón de parladors, ye la principal.

Bels lingüistas consideran que los idiomas norcaucasicos occidentals u abkhasio-adigueus y los orientals u nakh-daguestanís forman una mesma macrofamilia, la norcaucasica -dita a vegatas simplament caucasica, mesmo si ixo n'exclui idiomas surcaucasicos-, propuesta que no conta con una ampla acceptación.

Dende lo naiximiento d'a lingüistica acomparata en o sieglo XIX, l'aparent aislamiento d'os idiomas caucasicos ha feito que muitos lingüistas s'interesasen a mirar de relacionar-los con familias difuera d'a rechión d'o Caucas. Si bien la mayoría de propuestas no son acceptatas, ye posible que existís bella connexión entre los idiomas norcaucasicos y bels idiomas estinguitos que se charrasen antis mes a Anatolia y lo norte de Mesopotamia, como lo hatti u las luengas hurrito-urartianas.

En a versión d'a superfamilia dené-caucasica d'o lingüista Serguei Stárostin, lo caucasico nororiental y lo hurrito-urartián sería relacionato només que en un nivel superior d'a familia clamato sino-caucasico.

Muitas d'as luengas caucasicas fan servir sistemas de casos, un d'os cuals, lo ergativo, las alparta tipolochicament de cuasi toz es idiomas europeus, fueras d'o basco. La imposibilidat d'emparentar lo basco con os suyos vecins indoeuropeus fició que los lingüistas mirasen de trobar-li parients a altros puestos. Bels indicios lexicos y morfolochicos (como lo debantdito ergativo) son los que levoron a relacionar istos idiomas, estando una d'as teorías mes elaboratas la d'a hipotesi dené-caucasica de John D. Bengtson; las prebas socheritas, encara que tentadoras, no se consideran decisivas per la mayoría de lingüistas y la cuestión d'o emparentamiento d'o basco contina bien ubierta y per aclarir.

En anglés:

• Mapa lingüistico de TITUS (Jost Gippert)
• Mapa etnolingüistico d'a CIA
• Mapa lingüistico de familias (Matthew Dryer)
• Mapa etnolingüistico de Tachikistán (Iraj Bashiri)
• Las connexions ibero-caucasicas dende una anvista tipolochica - Estudio d'o basco, lo cheorchiano y altras luengas ergativas que conclui que las similituz no son prou convincents ta prebar bella relación chenetica.
• Instituto A. Chikobava de Lingüistica, Academia Cheorchiana de Sciencias
• Notas acomparativas d'o hurrito-urartián, lo norcaucasico y lo indoeuropeu (Vyacheslav V. Ivanov)