Charo

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Iste articlo tracta sobre Charo que ye un lugar en o municipio d'a Fueva. Ta altros usos de «Charo» se veiga Charo (desambigación).

Charo
Lugar d'Aragón
Entidat  • País  • Provincia  • Comarca  • Municipio	Lugar  Aragón  Uesca Sobrarbe A Fueva (municipio)
Partiu chudicial	Boltanya
Población  • Total	36 hab. (2011)
Altaria  • Meyana	800 m.
Distancia  • 124 km  • 14 km  • 3,5 km	enta Uesca enta L'Aínsa enta Tierrantona
Codigo postal	22337
Patrons	Sant Martín de Tours
Parroquial  • Diocesi  • Arcipestrau  • Parroquia	Balbastro-Monzón Sobrarbe-Ribagorza Sant Martín
Coordenadas	42°23′24.57″N 0°15′29.07″E
Charo Charo en Aragón

Charo (/'tʃaɾo/) ye un lugar aragonés d'o municipio d'a Fueva, en a comarca de Sobrarbe y a provincia de Uesca. A suya población ye de 36 habitants (2011^[1]).

Va estar a cabecera d'un municipio, que tamién heba nombre Charo,^[2] dica que o van absorver en o municipio de Muro de Roda cara ta 1857.^[2][3]

Charo se troba en alto en un sarrato d'o tozal homonimo, en as garras en sud-este, cosirando dende a suya posición a fondonada de a Fueva. Dende o lugar, se vei Tierrantona por debaixo, y tot o solano de Ranyín con os cinco nuclios de población (Ranyin, o Lumo de Ranyín, a Lueza, Solipueyo y Buetas) que o forman, chusto en a cuentra de o barranco d'a Usía.

Se o documenta con o nombre escrito como «Jaro» en os textos medievals, pus que a «i larga» yera la grafía habitual ta o fonema [tʃ] en aragonés medieval. Va estar cabecera de municipio dende os primers censos modernos en 1834^[4] dica a suya absorción en o municipio de Muro de Roda en o periodo 1842-1857.^[2][3] Tamién feban parte d'o suyo municipio as aldeyas historicas de a Lueza y o Pocino, que con Charo se van achuntar en Muro de Roda. Como toz os nuclios de Muro de Roda, Charo, a Lueza y o Pocino s'achuntón en o municipio actual d'a Fueva en a decada de 1960.^[3][5]

Forman o lugar dos barrios; o mas alto ye mas nuevo y se forma de cualques casas, o barrio d'abaixo ye o nuclio primordial, y tiene una caracteristica forma defensiva. O barrio viello consta d'una carrera sola que l'atraviese, y unaltra que l'arrodeya por o costau de l'este. Todas as casas se troban d'entre ixas dos carreras, presentando o culo a la carrera d'afuera, y con a frontera principal ta la carrera interior, en a que se concaran, por o costau de l'ueste, bellas bordas que cierran a estructura d'o lugar.

D'una forma que recorda muitismo a la estructura d'o Pueyo d'Araguás, a dentrada principal ta lugar ye a que mira ta la fueva de debaixo y pasa por una arcada por debaixo d'o casal fuerte principal, que en Charo ye Casa Baltasar, que por a frontera d'afuera presenta una gran torre barranya de cuatro pisos d'alta que serviba ta guardar l'acceso. L'altra dentrada, menor, yera por o canto an que ye a ilesieta primera, que anque se tracta d'una construcción modesta, d'o sieglo XVI y en l'actualidat destinada ta borda, tiene aspilleras y belaltras formas de defensa ta cubrir a dentrada ta lugar por ixa parte. Ista altra dentrada, anque en l'actualidat ye descubierta, conserva sinyals (una viga rompida) que fan pensar que enantes tamién podeba estar cerrada con bella planta superior fendo arcada por ixe acceso.

A ilesia parroquial de Charo, encara funcional, ye una construcción mas tardana. Se troba desalpartada de lugar bellas docenas de metros, en a baixant d'o sarrato cara t'Aluchán. O campanal se piensa que podría haber estau una torraza d'antes que no torre d'a ilesia.^[4]

Seguntes Agustín Ubieto Arteta s'escribe Iaro en 1098, Jaro en fogache de 1495) y 1646, formas lochicas en a grafía medieval, que feba servir a j u a i pa representar l'actual fonema que s'escribe con o digrafo ch. S'escribe Charo dende 1713.

• 
  L'actual dentrada ta lugar ye por o costau contrario a como yera o camín tradicional.
• 
  A ilesieta viella, actualment en desuso.
• 
  Casa Baltasar guarda a dentrada tradicional ta lugar.
• 
  L'arcada por debaixo de casa Baltasar.
• 
  A sola carrera de o barrio viello.
• 
  Una casa de turismo rural, con o nombre en aragonés.
• 
  Una viga querada a'l canto d'a ilesia viella fa pensar en unaltra arcada ta defender por ixe costau.
• 
  Inscripcions en a ilesieta viella (sieglo XVI).

• 1 de mayo, fiesta menor,^[6] fendo-le honras a Sant Salvador, que se celebra de conchunta con os vecins de o Pocino y con a Lueza.
• 6 de chunio, romería ta la ermita de Sant Salvador,^[6] que ye en a corona d'o tozal de Charo.
• 11 de noviembre, Fiesta Mayor, fendo-le honras a Sant Martín.^[6]

• Se veigan as imáchens de Commons sobre Charo.