Zelwort

S Zelwort (au: Zeläinhäitswort, Kategoriiwort, Numeralklassifikator oder Klassifikator) isch e Zuesatz zu Zaale, wo bi dr Bildig vo Mängeaagoobe as Zeläihäit, und au allgemäin zur Bildig vom Plural verwändet wird.

In e baar Sprooche si Zelwörter obligatorisch, si müesse bi jedere Aagoob von ere Mängi verwändet wärde. Zu deene Sprooche ghööre under anderem die sinotibetische Sprooche (zum Bischbil Chinesisch) und d Kam/Tai/Sprooche (zum Bischbil Thai). Dört bilde d Zaal und s Zelwort zämme e Zaalwort. Je noch dr Bedütig vom zelte Begriff (wie langi Gegeständ, flachi Gegeständ, Dier, Mensche, Buechsite, Bärg usw.) muess mä e bassends Zelwort weele. S Japanische het e Hufe Zelwörter us em Chinesische übernoo.

Im Dütsche git s no Räst vo Bildige, wo früener üüblig gsi si: zwäi Laib Broot oder zwäi Glas Milch (statt zwäi Gleeser Milch). Anderi Bischbil im Dütsche si Blatt, Bund, Gramm, Kilo, Maa, Baar, Pfund, Sack, Schuss und Stück.

Dä Artikel basiert uff ere fräie Übersetzig vum Artikel „Zählwort“ vu de dütsche Wikipedia. E Liste vu de Autore un Versione isch do z finde.