Schwarzwälder Kirschtorte

D Schwarzwälder Kirschdort isch a siaß Backwerk, wo et bloß en ganz Deitschland, sondern au noh weit driiber naus vorbroidet ischt ond wahrscheinlich – trotz em Nama – gar-et us-em Schwarzwald stammt. En dr Schweiz hoißt si vrkirzt Schwarzwäldertuurte.

Ibr d Herkonft vo dr Schwarzwälder Kirschdort geit’s ondrschiidliche Deidonga. Laut-em Buach Kulinarische Streifzüge durch Baden^[1] soll dui Dort vo-ma orientalischa Einucha, wo gleichzeidig Chefkoch vo-ma Harem gwäa ischt, erfonda worra sei. Der häb ôôgeablich vo seim Scheich da Uftrag kriagt, d Weibr vo seim Harem mit-ra krefdiga Kaloriabomb zo fiddra, damit deane ihre Forma a bissle ronder werret.

Nôch-ra andra Version, wo a bissle glaubhaftr klengt^[2] isch dui Dort so entstanda:

Bevôr dr Konditr Josef Keller us Radolfzell sei Moischtrpriafong gmacht hot, hot’r 1915 em Café Agner z Bad Godesberg – heit geit’s des nemme – gschafft. Des Lokal isch dômôls hauptsächlich vo dr Prominenz ond vo Studenda aus Bonn ufgsuacht worra. Bsondrs gschmeckt hot deane emmr d Schbezialideet vom Haus: Schlagsahne mit Kirscha. Ama scheena Dag isch dr Keller uf dui Idee komma, des Ganze mit-ma bachena mirba Doigboda zo ondrlega ond mit Kirschwasser zo vorfeinra.

Wia sich dr Keller em Johr 1919 hot „Moischtr“ nenna däffa, hot’r sich en seira Hoimetstadt selbstendig gmacht ond emmr weitr an seira Kreazioo vo Bad Godesberg romexperimentiirt, bis’r mit-em Ergeabnis zfriida gwäa ischt. 1927 schliaßlich hot’r zom erschda Môl s Rezept vo seira Dort ufzoichnet ond-ra da Nâma Schwarzwälder Kirschtorte gäa. So jedafalls isch dui Gschicht vo-ma Schweizer Journalischda, wo dô drzua johrelang recherchiirt han soll, ibrliifret worra. Da Keller selbr hot’r nemme frôga kenna, denn dr sell hot scho 1981 em Altr vo 94 Johr s Zeitliche gsegnet.

S geit au Ôôhaltsponkt dô driibr, dass dui berihmda Dort em Frialeng 1930 vom Konditr Erwin Hildenbrand em Café Walz z Diibenga erfonda worra sei soll. Des will dr Diibenger Stadtarchivar Udo Rauch rausgfonda han.^[3]

Wia bei fascht älle Sacha zom Essa geit’s au fir d Schwarzwälder Kirschdort an Haufa Rezept, wo zom Doil bloß a bissle ond zom Doil au gheerich vo-nanandr abweichet, et bloß en de Zuatada, sondrn au em Ausseha. Drom wuud en deam Artikl au bloß ois vo viile megliche Rezept beschriiba.

Zerscht môl an Mirbdoigboda ond zwoi Schokladbeeda. Wer dia drei Sacha selbr et macha kô odr will, kauft se am beschda glei ferdig bei-ma Beck bzw. Konditr odr e-ma Feinkoschtgschäft. Weidr braucht-ma 100 Gramm Gsälz vo saure Kirscha ond 250 Gramm eidenschdete Sauerkirscha, wo ma au fertig em Glas kaufa kô. Nô braucht ma noh 100 Gramm Kirschasaft, 115 Gramm Zuckr, 15 Gramm Woizapudr, a Priis Zemt, drei Nelka, viir Bleddr Gelatine, an halba Litr Schlagsahne, graschblede Schokladschbee ond 50 bis 60 Gramm Schwarzwälder Kirschwasser. Des muaß-ma schbätr e dr Dort au rausschmecka.

Zerscht leert mr s Kirschagsälz uf da Mirbdoigboda ond streicht’s glatt. Nô legt mr dô druf da erschda Schokladboda. Als nägschdes duat-ma da Woizapudr mit a bissle kaldem Sauerkirschasaft ôôrihra ond da greeßra Doil vom Saft mit 75 Gramm Zuckr ufkocha. Nô werret dia zwoi Sacha mitnandr vrmischt. Jetzt kommet d Sauerkirscha ond d Gwirz drzua. Nô muaß-ma warda, bis des älles kalt worra ischt. Wenn’s so weit ischt, kommet d Kirscha uf da Kuacha. D Gelatine muaß-ma emma kalda Wassr eiwoichna. Nô druckt-mr se aus, leest-se uf ond zuit-se ondr d Sahne, wo mr vôrher mit-em reschtlicha Zuckr ond mit-em Schwarzwäldr Kirschwasser vrmischt hot. D Hälfde vo dera Masse vrdoilt mr jetzt uf-em Kuacha. Dô druf setzt ma da zwoida Schoko-Boda ond streicht dô driber da Rescht vo dr Schlagsahne. Sobald dui nemme läpprich ischt, garniirt mr des Ganze noh mit graschblede Schoklad-Schpee, ond nô endlich isch dui Schwarzwälder Kirschdort fertich.

1. ↑ Georg Richter: Kulinarische Streifzüge durch Baden, Sigloch Edition Künzelsau, Salzburg, Thalwil, 1982, ISBN 3800301741, S. 168
2. ↑ Baedeker-Reiseführer Deutschland, 4. Uflag vo 1988, Mairs Geographischer Verlag GmbH & Co., Ostfildern, ISBN 3-89525-697-8, S. 691
3. ↑ Pressemitteilonga vo dr Stadt Diibenga Archivlink (Memento vom 27. Septämber 2007 im Internet Archive)

 Commons: Vrschiidene Variaziona vo dr Schwarzwälder Kirschdort – Sammlig vo Multimediadateie

• Hischdorische Quella beim Conditorei-Museom z Kitzenga]
• „Schwarzwälder Kirschtorte: Die rheinische Tortenlegende zerkrümelt“, FAZ, 3. Februar 2007, a Interview mit-em Diibenger Stadtarchivar Udo Rauch
• Die Geschichte der Schwarzwälder Kirschtorte. Gschichda rond om dui Dort