Südarabie

Mit Südarabie wärde im Gegesatz zu Nordarabie mäistens die Däil vo dr arabische Halbinsle bezäichnet, wo südlig vo Zentralarabie (Innerarabie) bzw. Saudi-Arabie lige. D Region wird im Oste und Süde dur s Arabische Meer bzw. dr Indisch Ozean begränzt.

En entsprächendi Underdäilig in Westarabie (Hedschas und Asir am Rote Meer) und Ostarabie („Pirateküste“ am arabisch-persische Golf) wird sältener verwändet, mä schwätzt dört eender vom Hedschas und vo de Golfstaate, wil mit Westarabie au dr ganz Maghreb (Marokko, Algerie, Tunesie) und mit Ostarabie dr Maschrik (arabische Oste) gmäint cha si. Südarabie isch dr südlig Däil vom Maschrik.

Im ängere Sinn bezäichnet mä as Südarabie nume dr Jemen im Südweste, nume dr Nordjemen isch bis uf en antiki ethiopischi Zwüschezit und e spööteri luggi osmanischi Oberhohäit vo fremde und Kolonialmächt verschont bliibe. Im Südjemen het s zur Zit vo dr britische Kolonialherrschaft sogar zwäi churzlääbigi Protektorat mit Südarabie im Staatsname ge, die Südarabischi Föderazioon und s Protektorat vo Südarabie. Im witere Sinn zele aber au Oman im Südoste zu Südarabie und mänggisch sogar die ehemols arabische Gebiet vo Ethiopie bzw. Somalia, Eritrea und Dschibuti am Horn vo Afrika, wo wisawii vo dr arabische Halbinsle lige.

Historisch isch d Entwigglig vo dr Region vor und au noch dr Islamisierig vi dere im Norde berschiide gsi, au wenn si dur Karawanewääg imme mitenander verbunde gsi si. Die jemenitisch Hauptstadt Sanaa gältet näbe Damaskus und Jericho as äini vo de dri eltiste Stedt uf dr Wält, wo duurhaft bewoont gsi si. D Region am Usgangspunkt vo dr Weirauchstrooss isch d Häimet vo de Sabäer, Minäer und Himyare. Näben em Riich Saba si Ausan, Hadramaut und Mahra lang unabhängig gsi.

Denn isch dr Begriff Südaraber, wo dur e jemenitisch Stamm vo de Qais verdräte worde isch, as Bezäichnig für d Gegner vo dr Umayyaden-Dünastii verwändet worde. Im Gegesatz zu loyale „Nordaraber“ häi sich d Südaraber dr vor-abrahamitisch Patriarch Qahtan (Kahtan) as iire Vorfaar aagluegt. Dr Naame Qahtan isch as Familienaame und au as Vornaame no hüte im Jemen sterker verbräitet as in jedem andere arabische Land. Dr Landesnaame Yaman (Jemen) söll sogar vom ene südarabische Köönig Ayman bin Yaarub bin Qahtan abgläitet worde si.

Dr Konflikt zwüsche de Nord- und de Südaraber het au im muslimische Spanie (al-Andalus) im Färne Weste (Maghreb) bestande.

In Libie behaupte die berberische Hawwara (östlig vo Tripolis) und Mazata, ass si vo jemenitische Stämm abstamme.