Lakoonie

Lakonien (noigriech. Λακωνία) isch e griechischi Landschaft im Süüde vo dr Regioon Peloponnes. Si het e Flechi vo 3'638.911 km² und fümf Gmäinde mit 89'138 Iiwooner (im Joor 2011).

Lakoonie isch in dr Antike usserdäm dr Naame vom spartaanische Staat gsi, wo die freije Iiwooner von em Lakoonier oder Lakedaimoonier ghäisse häi. Vom Adjektiv lakoonisch as Bezäichnig für d Spartaaner chunnt dr Usdruck lakoonischi Reed.

Noch dr Gründig vom modärne Staat Griecheland, 1833, isch Lakoonie as Prefektuur iigrichdet worde und und isch s bliibe, mit churze Underbrüch bis zur Verwaltigsreform 2010. Denn si d Kompetänze vo dr Prefektuur de Gmäinde überdräit worde, wo mä zämmegläit und eso iiri Zaal uf fümf reduziert het, und dr Regioon Peloponnes. Sit denn bildet Lakoonie dr Regionaalbezirk Lakoonie (Περιφερειακή Ενότητα Λακωνίας Periferiakí Enótita Lakonías). Dä schickt acht Delegierti in dr Regionaalroot vo dr Regioon Peloponnes, het aber sust kä politischi Bedütig. Lakoonie umfasst d Gmäinde Anatoliki Mani, Elafonisos, Evrotas, Monemvasia und Sparta.

Lakoonie befindet sich zwüschen em Parnon- und em Taygetos-Gebirg, Gebirgszüüg, wo mäistens mee as duusig Meeter hooch si und in dr Antike eso dr ganz Landstrich in zun ere Festig gmacht häi. Die Gebirgszüüg laufe in zwäi „Fingern“ vo dr Halbinsle Peloponnes us, dr Parnon am Ändi von ere eender niidrige Chetti vo Karsthüügel im Kap Kremidi, dr Taygetos in dr Halbinsle Mani. Zwüschene befinde sich dr lakoonisch Golf und s fruchtbaare Daal vom Fluss Evrotas, wo noch öbbe 70 km in dr lakoonisch Golf fliesst. Sini vile Nääbeflüss sorge im ganze Daal für e gliichmäässigi Bewässerig.

Vo Sparta, wo in dr Antike e mächdigi Hauptstadt gsi isch, si nume non e baar archeoloogischi Räst üübrig. Zu de berüemtiste turistische Ziil in dr Prefektuur ghööre die büzantiinischi Ruinestadt Mystras und d Dropfstäihööli vo Diros in West-Mani.

Wo Lakoonie gründet worde isch, het s Gebiet us de Browinze

• Epidavros Limiras (Επίδαυρος Λιμήρας), Hauptort Molai
• Lakedaimon (Λακεδαίμων), Hauptort Sparta
• Gythio (Γύθειο), Hauptort Gythio
• Itylo (Οίτυλο), Hauptort Areopoli

bestande.

E Zit lang isch Lakoonie vo 1836 bis 1845 und vo 1899 bis 1909 in zwäi Gebiet iidäilt gsi, nämlig in Lakoonie mit de Browinze Gythio und Itylo (vo 1899 bis 1909 as Prefektur Lakoniki) und Lakedaimon im ängere Sinn, wo d Browinze Lakedaimon und Epidavros Limiras umfasst het. D Browinz Kythira het vo 1866 bis 1909 zur Prefektuur Lakoonie bzw. Lakoniki ghöört.

• Landschaftsbeschriibig
• Gschicht und Geografii vo Lakoonie

Dä Artikel basiert uff ere fräie Übersetzig vu dere Version vum Artikel „Lakonien“ vu de dütsche Wikipedia. E Liste vu de Autore un Versione isch do z finde.