Karl Landolt

De Karl Landolt (* 20. Meerze 1925 z Züri;^[1] † 17. Dezämber 2009 z Stääfe) isch en Schwyzer Maaler, Graafiker, Zäichnigsleerer, Holzschnyder, Litograaf und Töpferer gsy.

De Landolt hät zeerscht bi sym Vatter e Leer as Beck gmachet. Drufaben isch er a d Kunschtgwèèrbschuel Züri (hüt Zürcher Hoochschuel vo de Künscht) und isch deet under anderem en Schüeler gsy vom Ernst Gubler und em Heinrich Müller. Nach eme Stuudienuufenthalt z Parys hät er wider i de Beckerei vo sym Vatter gschaffet. Irgedwänn hät er si dän aber chönen as Künschtler sälbständig mache, und zum gnueg verdiene hät er a de Kantonsschuel Wintertuur as Zäichnigsleerer gschaffet.^[2]

De Landolt hät 1951 en Äidgnössischs Kunststipändium und 1965 de Conrad-Ferdinand-Meyer-Prys überchoo.

Syni Wèèrch hät er under anderem im Kunschthuus Züri, i de Kunschthale Basel, im Kunschtmuseeum Luzèèrn, im Kunschtmuseum Olte und im Kunschtsalon Wolfsberg z Züri uusgstelt.

Er isch ghüraate gsy und hät föif Chind ghaa.

• Landolt, Karl. In: Sikart (Lexikon un Datebank zue dr Chunscht in dr Schwyz un im Firschtetum Liechtestei).
• Publikatione vo und über Karl Landolt im Katalog Helveticat vo der Schwiizerische Nationalbibliothek
• Karl Landolt. In: XYLON 10
• Karl Landolt im e-museum Museum für Gstaltig Züri

1. ↑ Luut em Sikart-Läxikon z Züri, luut em Traugott Vogel z Stääfa, aber mer glaubed iez em Sikart mee.
2. ↑ Traugott Vogel: Besuch bei Karl Landolt. I: Xylon 10, abgrüefft am 2. Abrele 2023.

Dä Artikel basiert uff ere fräie Übersetzig vu dere Version vum Artikel „Karl_Landolt“ vu de tüütsche Wikipedia. E Liste vu de Autore un Versione isch do z finde.