John Gay

Dr John Gay (* 16. Septämber 1685 z Barnstaple, Devonshire; † 4. Dezämber 1732 z London) isch en änglische Schriftsteller gsi, wo vor allem Gedicht, Erzäälige, Romään und Faable verfasst het. Zämme mit em Jonathan Swift, Alexander Pope und John Arbuthnot het dr Gay d Grubbe vo Tory-Satiriker bildet, wo as Scriblerus Club bekannt gsi isch.

Dr Gay isch us ere spaniolische Familie choo. No won er chlii gsi isch, het er sini Eltere verloore und er isch bi sim Unggle, em Reverend John Hammer, ufgwaggse. Er het uf dr Barnstable Grammar School gleert und het denn e Leer bim ene Siidehändler z London gmacht. Er het die Arbet ghasst, und het bald Zuegang zu literarische Zirkel in dr änglische Hauptstadt gfunde. 1712–1714 het er as Sekretäär im Huushalt vo dr Duchess of Monmouth gschafft. Därt het er im Joor 1714 The Shepherd's Week gschriibe, e Sammlig vo säggs Pastorale (Schööfergedicht). Spööter isch er dr Sekretäär vom Lord Clarendon worde, won e Abgordnete vo de Torys gsi isch. Noch em Dood vo dr Köönigin Anne isch d Tory-Regierig gstürzt worde, so dass dr Gay arbetslos worde isch. Er het Finanzspekulazioone gmacht, wo nid glunge si, und isch arm worde. In sine letschte Joor het er hauptsächlig bi sine Gönner gläbt, bim Duke und dr Duchess vo Queensberry in Wiltshire. 1732 isch er zrugg uf London und isch dört gstorbe. Dr Gay isch in dr Westminster Abbey begraabe. Uf sim Graabstäi stoot si Spruch:

Life is a jest, and all things show it;

I thought so once, and now I know it.

Das Leben ist ein Witz, und alles deutet darauf hin;

so dachte ich einst, nun weiß ich es.

Im Gay sis bekanntiste Wärk isch s Teggstbuech zum satirische Singspiil The Beggar's Opera. Mit dr Figuur vom Peachum, wo sich an dr bekanntist änglisch Verbrächer im 18. Joorhundert, dr Jonathan Wild, aaleent, het er gliichzitig dr britisch Brömiee Robert Walpole karikiert. D Muusig isch vom Johann Christoph Pepusch. Dr Pepusch het d Theme vo de 69 Muusig-Nummere us populääre Arie und Gsäng gnoo und het sälber nume d Uwerdüüre und äi Lied komponiert. The Beggar's Opera isch 1728 im Londoner Lincoln's Inn Theatre urufgfüert worde.

• John Gay, "Die Bettleroper". Mit Zäichnige vom Josef Hegenbarth, 1961

Dä Artikel basiert uff ere fräie Übersetzig vum Artikel „John_Gay“ vu de dütsche Wikipedia. E Liste vu de Autore un Versione isch do z finde.