Gutturals Singe

Gutturals Singe isch e Gsangsart, wo ir Kehle böudet wird um verzerrtes "Grunze" (Growling, Grunting), agruchtes Schreie (Shouting) oder "krächze" (Screaming, Shrieking) z'erzüge.

Meischtens wird gutturale Gsang i diverse Genres vom Metal (Death Metal, Black Metal, Thrash Metal, Metalcore, usw.) agwändet, es git aber ou angeri Genres, wo verzerrte Gsang bruche - zum Bischpöu Grindcore oder Industrial.

Dr Gsang wird, wie obe erwähnt, ir Kehle böudet.
Es git nid wörklech e "richtigi" Technik, föu Bands schreie eifach so, oni lang g'üebt z'ha. Die si de aber ou stark gfährdet, Stimmbänderknötli z'becho. Wäg däm isch es empfählenswärt, Gsangsstunde z'nää, wöu's föu Üebig brucht, die richtigi Atemtechnik z'beherrsche und d'Taschefalte bzw. "falsche" Stimmbänder z'bruche.