Früschchääs

Früschchääs si Chäässorte, wo, im Gegesatz zu vile andere Chäässorte, nit oder nume seer wenig müesse rife und wo mä sofort cha ässe. Iire Wasserghalt isch hooch, z Dütschland zum Bischbil muess er in dr fettfreie Chääsmasse mee as 73 Brozänt usmache. Dorum cha mä Früschchääs nid lang ufbewaare und er muess mögligst chüel glaageret wärde. Für zum Früschchääs mache, brucht mä weniger Lab as für anderi Chäässorte, d Tämpratuur bi dr Denaturierig isch niidriger, aber d Zit, wo s brucht, lenger. Mänggisch mischt mä Chuchichrüter dri und Gwürz. Es git en mit weenig aber au mit vil Fettghalt.

Bischbil vo Früschchääs:

• Brousse du Rove,
• Burrata,
• Hüttechääs, änglisch cottage cheese
• Mascarpone,
• Panir,
• Kwark, oder Wisschääs, wird nit dur Lab, sondern mit Hilf vo Milchsüüri denaturiert),
• Raam-, Doppelraam- oder Drefachraamchääs,
• Ricotta
• Ziger

Früschchääs häi kä Rinde und iir Aroma isch früsch und mild. Die mäiste si greemig und wäich und wärde dorum vilmol in Kunststoffbächer verpackt. D Farb änderet sich vo milchwiss bis bruun, je nochdäm wivil Fett din isch.

Z Dütschland darf Früschchääs nume us bastörisierter Milch gmacht wärde, und nit us Roomilch.

Dä Artikel basiert uff ere fräie Übersetzig vu dere Version vum Artikel „Frischkäse“ vu de dütsche Wikipedia. E Liste vu de Autore un Versione isch do z finde.