Burg Manegg

D Burg Manegg staat uf eme Gländvorsprung uf de Oschtsyte vom Albisgrat im Piet vo de Stadt Züri. Hüt isch vonnere nu na ganz wenig vo de Ruyne übrig.

D Burgstell lyt uf de Hööchi vo 624 Meter, diräkt oben am Stadtdäil Läibach, am Bèèrg oben a de Syl. So wie de Platz Manegg git’s am Albis und am Üetlibèèrg non es baar anderi Uuslöifer vom Bèèrg, wo mene im Dialäkt -egg säit: d Juchegg, d Bernegg, d Rossweidliegg und na anderi. So wie uf de Manegg isch au na uf ere andere Egg en Zürcher Burgruyne z gseh, d Frysebèèrg.

D Burg Manegg chunt s erschte mal im ene Dokumänt vo ane 1303 vor. Wie alt ass si isch wäiss me nöd. Im 14. Jaarhundert hät d Burg de Zürcher Ritterfamilie Manesse ghöört. De Ital Manesse hät se anne 1393 emene Visli vrchauft, und im Jaar 1400 isch si in Psitz vom Chlooschter Selnau cho. 1409 isch si abeprännt, und dänn isch si en Ruyne plibe.

De Burgplatz isch hüt en schönen Oort, wo men uf Wanderige hiigaat. Me cha verschideni Fuesswääg vo de Allmänd und vo Läibach gaa und bi de Manegg verby oben a de wilde Falätsche dure uf de Albisgrat.

• Walter Drack und Hugo Schneider: Der Üetliberg: Die archäologischen Denkmäler. Zürich, 1979.
• Emil Stauber: Die Burgen und adeligen Geschlechter der Bezirke Zürich, Affoltern und Horgen. Basel, 1955.

 Commons: Burg Manegg – Sammlig vo Multimediadateie

• d Burg Manegg