Apeiron

Apeiron isch ä philosophischä Begriff. Wörtlech übersetzt heisst s soviu wiä ds "Gränzälosä" oder ds "Unbestimmbarä".

Mä bringt dä Begriff hüffig i Verbindig mit äm Anaximander (610-546 v. Chr.), das isch ä Philosoph gsi, wo vor äm Sokrates (469-399 v. Chr.) het gläbt. Är het ä Theorii gha, was am "Afang" vo üsärä Wält isch gsi, är het bhouptet ds Apeiron. Im Gägäsatz zum Thales vo Milet (624-546 v. Chr.) und äm Anaximenes (585-525 v. Chr.) isch är dr erscht gsi, wo nid eifach het gseit, dass ds Wasser oder d Luft dr Ursprung vo üsärä Ärdä isch gsi. Sondern äbä öppis unbeschriblichs Unbeschränkts, wo wie nä Urenergie isch da gsi. Är isch o dr Meinig gsi, das ds Apeiron ä Ursubstanz isch, wo ä ständigi Bewegig het, und dadrus sigä alli Element entstandä.