Alla Borissowna Pugatschowa

D Alla Borissowna Pugatschowa (* 15. April 1949 z Moskau) isch e russische Popsängeri un Songschryyberi.

D Pugatschowa gältet as d Mueter vo dr russische Pop-Kultur und isch en Ikone vo dr russischen Popmusig. In de 1970er und 1980er het si mit iirem „Theater vom Lied“ nöiji Melodie und Daarstelligsforme iigfüert, wo in Ostöiropa bis denn umbekannt gsi si. Si het sich für d Liberalisierig vo dr Kunst in dr Sowjetunion iigsetzt und mee Individualismus und Kreatividäät uf dr Büüni gforderet. D Pugatschowa hat mit iire nöije Musigforme brobiert, westligi Rhüthme mit russische Melodie z verbinde. Si het au griisse Wärt gläit uf s Nivoo vo dr Lürik in iire Songs. Charakteristisch für iir Wärk isch d Vilsitigkäit; zum nöiji Forme finde het si mit verschiidene Liederarte experimentiert – vom Volkslied und dr Romanze bis in d Nööchi vom Hard-Rock.

D Popularidäät vo dr Pugatschowa isch in dr Sowjetunion am Aafang vo de 1980er Joor riisig gsi, iire Songs si joorelang uf de obere Blätz in de Tscharts ufgfüert worde. Sie het e Hufe Briis und Uszäichnige überchoo, het als ersti sowjetischi Sängere Wältturneä gmacht und het under anderem mit ABBA, mit em Udo Lindenberg und mit em Joe Dassin zämmegschafft.

Sit em Ändi vo de 19080er Joor angaschiert sich d Pugatschowa für d Noochwuggs-Sänger, si isch in verschiidene soziale Beriich däätig (under anderem für d Opfer vo Tschernobyl), aber au im brivatwirtschaftlige Beriich.

Im Merz 2022 het si mit irem Maa Russland verloo wäg em russische Aagriffschrieg gege d Ukraine und wohnt sithär z Israel.^[1][2]

• Offiziälli Websyte
• Alla Borissowna Pugatschowa in der Internet Movie Database
• Alla Borissowna Pugatschowa bi Discogs (änglisch)

1. ↑ Russian Megastars Alla Pugacheva, Maxim Galkin Flee to Israel. In: Haaretz. (haaretz.com [abgerufen am 25. März 2022]). 
2. ↑ Two famous Russian musicians have fled Russia to Israel - report. Abgruefen am 25. März 2022 (amerikanischs Änglisch).