Mitra

D Mitra (altgriech. Μίτρα, Mítra f.) isch de Name vonere persische Göttin, wo nume vom Historiker Herodot gnennt werd.

De Herodot schribt öber d Religioo vo de alte Perser:

»Si hend o glernt a de Ourania z opfere und hend de Kult vo de Assyrer öberno und vo de Araber. D Assyrer nenet si Aphrodite Mylitta, d Araber Alilat, d Perser aber Mitra.« _{Hdt. I,131}

Die Passaasch bim Herodot gelt as problematisch. Zwoor hend d Perser di solari Gotthait Mithra (agr. Μίθρας Míthras) vereert, wo aber immer as e männliche Gott bischribe werd, wäred de Herodot vonere Göttin redt. Ourania isch nämli e Name vo de griechische Liebesgöttin Aphrodite und Mylitta/Mylissa e Name vonere assyrische Göttin und d Alilat isch e guet bikannti arabischi Göttin, wo vorem Uufchoo vom Islam vereert woren isch.

Well aber anderi antiki Autore schriibet, as d Perser d Gotthaite nöd gschlechtlich denkt hebid, werd von e paar Forscher agnoo, as de Herodot doch de Mithra (Miθra) gmaint heb, ass aber de Vergliich mit de Liebesgöttin nöd korrekt sai. Anderi Forscher vermuetet hinderem Name e Wort för »Muetter« und bitrachtet d Mitra as e Form vo de Grosse Göttin.