Michael Gempart

Dr Michael Gempart (aigetli Albert Michael Gemperle; * 21. April 1934 z Winterthur; † 1. Meerz 2023 z Minche) isch e Schwyzer Schauspiiler gsii.

No dr Sekundaarschuel het dr Gempart Handelschaufmann gleert un het s Handelsdiploom gmacht. Derno het er vu 1957 bis 1960 Schauspiil an dr Bühnestudio Züri studiert un mit Uuszaichnig abgschlosse. Är het au ne Danzuusbildig gmacht un Gsangsunteriicht gnuu (Bariton). Bi dr Susan Batson z New York het er wytergmacht mit syre Schauspiiluusbildig. Eerschti Rolle het er vu 1957 bis 1959 am Schuspiilhuus Züri un 1958 am Stadttheater Bärn ghaa. Vu 1959 bis 1963 isch er Mitgliid vum Ensemble vum Theater Baasel gsii, wun er unter anderem dr Conrad in s Shakespeares Viel Lärm um Nichts (Reschy: Heinz Hilpert), dr Trinculo in s Shakespeares Der Sturm (Reschy: Adolph Spalinger) un dr Idiot in Andorra vum Max Frisch (Reschy: Erich Holliger) gspiilt het. 1963/64 isch er wider as Gascht am Schauspiilhuus Züri gsii. Vu 1964 bis 1967 het er am Bayerische Staatsschauspiil Minche gspiilt, unter anderem dr Donalbain in s Shakespeares Macbeth un dr Gymnasiast in Frühlings Erwachen vum Frank Wedekind. 1967/68 het er e Engaschmänt am Theater der Jugend z Minche ghaa un vu 1968 bis 1973 het er wider Bayerische Staatsschauspiil Minche gspiilt, unter anderem dr Lenaeus in Coriolan, ein Heldenleben vum Hans Hollmann noh em Shakespeare (Reschy: Hans Hollmann), dr Schlucker in s Shakespeares Ein Sommernachtstraum un dr Student in s Goethes Urfaust. Syt däre Zyt isch er unter em Chinschtlername Gempart ufdrätte.

Derno het dr Gempart as freie Schauspiiler gschafft. Anne 1973/74 isch er uf Turnee gange, 1975 isch er am Mozarteum z Salzburg as Gagler in Astutuli vum Carl Orff ufdrätte, 1976/77 het er am Theater Baasel gaschtiert (dr Fritz in Der schwarze Hecht vum Paul Burkhard), 1977 bi den Ruhrfeschtspiil z Recklinghausen (in Coriolan vum Shakespeare) un 1979 an dr Minchner Kammerspiil – Theater vu dr Juuged (dr Fazz in Die Schlündelgründler vum Ken Campbell). Anne 1980 het er im eemoolige Tramdepot Tüüfebrunne d Roll vum Lucky in Warte uf de Godot vum Samuel Beckett (Dialäktfassig: Urs Widmer, Reschy: Max Peter Ammann) gspiilt.

Derno het er Gaschtengaschmänt unter anderem am Dytsche Schauspiilhuus z Hamburg (1982 dr Kreon in Medea vum Euripides, Reschy: Barbara Bilabel), am Theater am Nöimärt Züri, am Staatstheater am Gärtnerplatz z Minche, am Minchner Volkstheater un bi dr Salzburger Feschtspiil ghaa (1992 dr Ahn in dr dytschsproochige Eerschtuffierig vu Wesele – Das Hochzeitsfest vum Wyspiašski, Reschy: Andrzej Wajda; 1993 d Mickey Mouse in dr Uruffierig vu Das Gleichgewicht vum Botho Strauß, Reschy: Luc Bondy). E baarmool het dr Gempart au am Theater Baasel gaschtiert (1988 e Pater in s Schillers Die Räuber, Reschy: Antje Lenkeit, un dr Fritsch in dr Uruffierig vu Die Theaterfalle vum Hansjörg Schneider, Reschy: Hartmut Wickert; 1990 dr Carter in Die See vum Bond, Reschy: Bilabel; 1996 Mech/Gougou/Doktor in Baal vum Bertolt Brecht) un am Schauspiilhuus Züri (1994 dr Philippeau in Dantons Tod vum Georg Büchner, Reschy: Uwe Eric Laufenberg; 1995 dr Schulmeister in Der Franzos im Ybrig vum Thomas Hürlimann) un au am Bernhard-Theater Züri (2001 dr Vater in Der muss es sein vum James Sherman, Reschy: Bruno Felix). Ab 2004 het er fir chuurzi Zyt zum Ensemble vum Wiener Burgtheater gheert. Anne 2013 het er z Wien in Wagnerdämmerung vum Paulus Manker dr Lohengrin gspiilt, eme Projäkt zum zum 200. Gebuurtsdaag vum Richard Wagner.

Dr Michael Gempart isch au reegelmääßig in Kino- un Fäärnseefilm ufdrätte.

Am 10. Meerz 2023 isch er z Minche im Alter vu 88 Johr gstoorbe.^[1]

• 1978: Hans Rothe: Besondere Kennzeichen: Kurzsichtig. Hörspiel um Georg Büchner – Reschy: Ulrich Lauterbach

• Hermann J. Huber: Langen Müller’s Schauspielerlexikon der Gegenwart. Deutschland. Österreich. Schweiz. Albert Langen • Georg Müller Verlag GmbH, München • Wien 1986, ISBN 3-7844-2058-3, S. 292.
• Thomas Blubacher: Michael Gempart. In: Andreas Kotte (Hrsg.): Theaterlexikon der Schweiz. Band 1. Chronos, Zürich 2005, ISBN 3-0340-0715-9, S. 695.

• Michael Gempart in dr Internet Movie Database
• Michael Gempart bi filmportal.de

1. ↑ Wir trauern um Michael Gempart: 21. April 1934 - 10. März 2023 Residenztheater München, 14. Meerz 2023.