Mainau

D Mainau isch en Insle im Bodesee.

Es isch die drittgröschti Insle vo däm See, und si lyt im Überlinger See; si het e Flechi vo öppe 45 Hektaare und ghört zum Gebiet vo dr Stadt Konstanz.

Anne 1242 isch d Mainau s erschte Mol erwäänt, si isch es Guet vom Chlooschter Rychenau gsi. Es het druff sid em Middelalter e Burg gha. A dere irem Platz isch vo 1739 bis 1747 es barocks Schloss bout worde, wo em Düütschen Oorde ghört het. Näbedra isch e Chile usem 18. Joorhundert. Sid 1928 isch d Insle im Psitz vom Königshuus vo Schweede gsi, und hütt isch si dr Lennart-Bernadotte-Familiestiftig.

Dr Fürscht Niklaus dr Zwöit vo Esterhazy het noch 1827 agfange sälteni Pflanze uf dr Insle z setze. Anne 1856 het dr badisch Grossherzog Friedrich dr Erscht bim Schloss es Arboreetum lo yrichte. Do drinn sind es baar hundert Baumsorte, wo me us vil Länder vo dr Wält gholt het. Im Zäntrum vom grosse Park het’s es Palmehuus und e grosse iteliänische Roosegarte mit öppe 500 Roosesorte, und ussedra sind uf dr Insle no vil mee Roose z gseh; me schetzt, es sigen öppe drissgtuusig. Und im Park verdeilt sind vil anderi Bluemefälder. Derzue chunt es Glashuus für Falter, wo drin bsunders Dier us Südamerika umeflüüged; das isch s zwöitgröschte Schmätterlingshuus vo Dütschland.

Im 20. Joorhundert isch d Mainau eini vo de grosse Attrakzioone vom Bodeseegebiet worde.

 Commons: Mainau – Sammlig vo Multimediadateie

• Website vo dr Insle Mainau