Vlag van Uruguay

Vlag van Uruguay

Gebruik	Nasionale vlag en vaandel
Verhouding	2:3
Goedgekeur	11 Julie 1830[1]
Ontwerp	Nege horisontale bane in wit en blou afwisselend met ’n goue Meison in die skildhoek.
Ontwerp deur	Joaquin Suárez

Die nasionale vlag van Uruguay (Spaans: Pabellón Nacional) is op 11 Julie 1830 amptelik in gebruik geneem. Die vlag vertoon nege horisontale bane in wit en blou afwisselend met ’n goue Meison in die skildhoek.

Die nasionale vlag van Uruguay is een van die drie amptelike vlae van Uruguay, die ander twee is die vlag van José Gervasio Artigas en die vlag van die Treinta y Tres. Dit bestaan uit ’n veld van nege gelyke horisontale bane, afwisselend in wit en blou. Die skildhoek is wit, met die gesentreerde Meison, waarvan 16 strale strek, afwisselend driehoekig en golwend.^[2] Die vlag is op 16 Desember 1828 amptelik goedgekeur en het tot op 11 Julie 1830 19 bane getoon, toe ’n nuwe wet die aantal bane tot nege verminder.^[3] Die vlag is deur Joaquín Suárez ontwerp.^[2]

Die Uruguaanse vlag het sy kleure ontleen aan die vlag van Argentinië terwyl die ontwerp ontleen is aan die vlag van die Verenigde State. Tot 12 Julie 1830 het die vlag sewentien bane gehad maar sedertdien is daar slegs nege. Die nege bane stel die toendertydse indeling van Uruguay in nege departemente voor; daar is vandag negentien departemente.

Die Meison simboliseer die songod Inti in die Inka-mitologie. Hierdie son is ook op die wapen van Uruguay en het twee keer soveel strale as die vlag van Argentinië.

Die nege bane is elkeen ewe hoog en is dus 1/9 van die hoogte van die vlag. Die skildhoek waarin die Meison is, is ’n vierkant waarvan die hoogte en breedte gelyk is aan vyf bane. Die skildhoek is dus 5/9 van die hoogte en 10/27 van die breedte.

Die son is in die middel van die skildhoek en is 11/15 van die hoogte en breedte daarvan. Die son het sestien strale, agt reguit en agt golwend. Elk van hierdie strale word deur ’n swart lyn in die lengte in twee dele verdeel.

Die kleurskema word hieronder gelys:

	Geel	Bruin	Blou	Wit
RGB	252-209-22	123-63-0	0-56-168	255-255-255
Heksadesimaal	#fcd116ff	#7b3f00ff	#0038a8ff	#FFFFFF
CMYK	0-17-91-1	0-49-100-52	100-67-0-34	0-0-0-0

Vlaggebruik in Uruguay is uniek in die sin dat daar drie “Nasionale baniere“ (Banderas Patrias) is: die Pabellón Nacional soos hierbo beskryf, die vlag van José Gervasio Artigas en die vlag van die Treinta y Tres. Hoewel die Pabellón Nacional die primêre nasionale vlag is, word die ander twee weens historiese redes ook erken. Al drie vlae word op regeringsgeboue vertoon.^[4]

Die vlag van Artigas (moet nie verwar word met die vlag van die departement Artigas nie), eer die Uruguaanse ‘vader van die vaderland’, José Gervasio Artigas. Die vlag bestaan uit drie horisontale bane in blou, wit en blou met ’n diagonale rooi baan van die skildhoek na die onderkant van die wapperkant.

Artigas se vlag is in 1812 ontwerp na die voorbeeld van Manuel Belgrano se ontwerp vir die Argentynse vlag, met die toevoeging van die rooi kleur as simbool vir die bloed wat vergiet is in die stryd om onafhanklikheid. In die eerste instansie is ’n dun rooi baan in elk van die blou bane geplaas, maar in 1814 het Artigas die twee rooi bane met een diagonale rooi baan vervang. In die jare daarna is die vlag dikwels deur Artigas se opstandelinge gebruik en gehys in die stede wat onder beheer van Artigas was. Hierdie vlag is op 13 Maart 1815 in die Argentynse Entre Ríos gehys, waardeur die basis vir die huidige vlag van Entre Ríos gelê is.

Die weergawe met die diagonale rooi baan us sedert 18 Februarie 1952 amptelik ’n Bandera Patria.

Die vlag van die Treinta y Tres (moet nie verwar word met die vlag van die departement Treinta y Tres nie) eer die opstandelinge wat onder leiding van Juan Antonio Lavalleja in 1825 onder hierdie naam Uruguay vanuit Argentinië binnegeval geval het om die inlywing van Uruguay deur Brasilië ongedaan te maak. Die vlag is ’n driekleur in blou, wit en rooi met die woorde Libertad o Muerte (Vryheid of Dood) in die wit baan.

Die vlag wat Lavalleja tydens sy aanval gebruik het, is tydens ’n aksie van die anargistiese beweging OPR 33 gesteel en is tot vandag nog verlore.

Wikimedia Commons bevat media in verband met Vlae van Uruguay.

• (en) Uruguay by Flags of the World.
• (en) "Flag of Uruguay". Encyclopædia Britannica. Besoek op 21 Mei 2019.

Hierdie artikel is in sy geheel of gedeeltelik vanuit die Engelse Wikipedia vertaal.

Hierdie artikel is in sy geheel of gedeeltelik vanuit die Nederlandse Wikipedia vertaal.