Trondheimsfjord
Die Trondheimfjord (Noors: Trondheimsfjorden) is die derde langste fjord van Noorweë met 'n lengte van 130 kilometer. Die fjord was reeds in die Wiking-tydperk 'n beduidende waterweg.
Geografie
[wysig | wysig bron]Die fjord lê in die weste van Sentraal-Noorweë en strek vanuit Ørland in die weste tot by Steinkjer. Die stad Trondheim is die naamgewer van die fjord wat sy diepste punt met 627 meter benede seevlak naby Agdenes bereik. Die grootste eilande in die fjord is Ytterøy en Tautra.
Die vlaktes oos en suid van die fjord maak deel uit van Noorweë se mees geskikte landbougebiede. Die bergagtige Fosen-skiereiland is in die weste en noordweste geleë en dien as 'n natuurlike beskerming teen die sterk kuswinde.
Stede en nywerhede
[wysig | wysig bron]Die stede Stjørdal, Levanger en Steinkjer is aan die oostelike en noordelike kus van die Trondheimsfjord geleë. Verdal is die setel van die skeepswerf Aker Verdal wat groot olie- en gasboorplatforms bou. 'n Skeepswerf in Rissa bou plesierbote soos die luukse passasierskip The World.
Natuur
[wysig | wysig bron]Die fjord pronk met 'n ryk mariene fauna met meer as 90 visspesies. Dit is ook 'n habitat vir steenkoralle soos Lophelia pertusa.