Rapport

Rapport is 'n Afrikaanse koerant wat elke Sondag deur Media24 uitgegee word. Die koerant se leuse lui: "Ons praat jou taal".^[1]

Rapport is in 1970 gestig, word landswyd versprei, en het 'n sirkulasie van 296 237 eksemplare gehad in die tydperk van Julie tot Desember 2007, maar in die vierde kwartaal van 2013 net 187 288,^[2] sowat 'n kwart van die gesamentlike sirkulasie van die twee Sondagblaaie waaruit Rapport ontstaan het. In die tweede kwartaal van 2015 het die sirkulasie verder geval tot 146 402, vergeleke met 176 798 in die ooreenstemmende tydperk 'n jaar vantevore, en in die eerste kwartaal van 2016 tot sowat 131 004.^[3] In die tweede kwartaal van 2019 was Rapport se sirkulasie 99 528 en in die eerste kwartaal van 2020 90 393. In die eerste kwartaal van 2022 was dit 67 587.^[4]

Rapport het ontstaan nadat die Sondagkoerante Die Beeld en Dagbreek, wat onderskeidelik deur Nasionale Pers en Perskor besit is, saamgesmelt het in 'n 50:50-samewerking tussen die twee mededingers. Die naam Beeld is later aan 'n dagblad vir die Johannesburgse mark in 1974 gegee, wat die persstryd in die destydse Transvaal opnuut laat opvlam het.^[5][6]

Nadat Caxton/CTP in 1999 met Perskor saamgesmelt het is Perskor se aandele in Rapport saam met City Press aan Naspers verkoop om Naspers alleeneienaar van die Sondagkoerant te maak.^[7]

Rapport se sirkulasie daal reeds sedert sy stigting. Terwyl dit in 'n stadium meer as 500 000 was, was dit in die laaste helfte van 2007 minder as 300 000 en teen einde 2012 sowat 210 000. In die eerste kwartaal van 2014 het dit op 177 016 gestaan, vergeleke met 210 675 in die ooreenstemmende kwartaal van 2013. In die eerste kwartaal van 2017 was die sirkulasiesyfer 128 460 en drie maande later 124 306.

In 2007 was dit die eerste keer dat die gesamentlike sirkulasie van die Afrikaanse dagblaaie die sirkulasie van Rapport oortref het: Die Burger, Beeld en Die Son het toe elk sowat 100 000 eksemplare per dag en Volksblad sowat 30 000 verkoop, vir 'n totaal van 330 000. Op Rapport se hoogtepunt in die vroeë jare 70 was die gesamentlike sirkulasie van die indertydse agt Afrikaanse dagblaaie (daar is tans net vier, as Die Burger se uitgawes vir die Wes-Kaap en die Oos-Kaap as een gereken word) sowat 305 000. Die destydse agt dagblaaie was Die Burger, Beeld, Oosterlig en die Volksblad van Naspers en Die Vaderland, Die Transvaler, Oggendblad en Hoofstad van Perskor.

Waldimar Pelser het in 2013 die leisels by Bokkie Gerber oorgeneem as redakteur. Gerber het op sy beurt Liza Albrecht opgevolg.^[8]

Vanaf 1 Februarie 2022 het Inge Kühne oorgeneem as redakteur by Pelser.

• The Media Online

• Rapport se webtuiste is in 2014 opgeneem in Netwerk24 Geargiveer 24 Augustus 2007 op Wayback Machine. URL besoek op 29 November 2014.