Stirling Moss

Stirling Moss
Stirling Moss by Kopenhagen-lughawe (18 Augustus 1958)
Geboortedatum	(1929-09-17)17 September 1929
Geboorteplek	Wes-Kensington, Londen, Engeland
Sterfte	12 April 2020 (op 90) Mayfair, Londen, Engeland
Nasionaliteit	Brit
Aktiewe jare	1951–1961
Ou span(ne)	Mercedes-Benz, Maserati, Vanwall, Rob Walker Cooper, Lotus, HWM
Inskrywings	67 (66 begin)
Kampioenskappe	0
Oorwinnings	16
Podiums	24
Loopbaanpunte	185
Voorste wegspronge	16
Vinnigste rondtes	19
Eerste F1-wedren	1951 Switserse Grand Prix
Eerste wen	1955 Britse Grand Prix
Laaste wen	1961 Duitse Grand Prix
Laaste inskrywing	1961 Verenigde State Grand Prix

Sir Stirling Moss OBE (17 September 1929 – 12 April 2020) was 'n Britse renjaer. Hy was die seun van Alfred Moss wat die veertiende plek behaal het in die Indianapolis 500-wedren van 1924. Moss is in London gebore.

Stirling Moss is 'n pionier in die Britse Formule Een-wedrenbedryf en word as een van die beste renjaers beskou wat nooit die Wêreldkampioenskap vir renjaers kon wen nie. Hy het tussen 1955 en 1958 vier keer die tweede plek behaal.

Moss het 194 van sy 497 wedrenne tussen 1948 en 1962 gewen, wat 16 Formule Een Grand Prix-oorwinnings insluit. Vir Moss was die manier waarop die stryd gevoer word net so belangrik as die uitslag en sy goeie sportmansgees het hom moontlik die Wêreldkampioenskap gekos toe hy sy teenstander Mike Hawthorn verdedig het toe daar in Portugal oorweeg is om hom weens 'n oortreding te straf. Hawthorn het Moss toe uiteindelik met 'n enkele punt geklop ten spyte daarvan dat hy slegs een wedren gewen het teenoor Moss se vier.

In 1962 is Moss ernstig beseer tydens 'n ongeluk in Goodwood in sy Lotus. Hy het goed herstel maar te vroeg terug gekeer tot motorwedrenne. Hy het egter agtergekom dat hy nie meer die mas kon opkom nie en sy uittrede uit Grands Prix-wedrenne aangekondig. Hy het egter aanhou deelneem aan veteraanmotorwedrenne.

Een van sy beroemdste wedrenne was tydens die "Mille Miglia" van 1955, 'n 1 500 km-ooppad-uithouren in Italië, wat hy in 'n rekordtyd van 10 uur en 8 minute gewen het (Juan Manuel Fangio het tweede geëindig). Sy medebestuurder in die Mercedes-Benz 300 SLR was die joernalis Dennis Jenkinson wat hom ondersteun het met notas oor die besonderhede van die lang pad ('n innovasie wat direk gelei het tot die instel van die navigator met sy roetenota's in tydrenne).

Moss se eerste Formule Een-oorwinning was in 1955 by die Britse Grand Prix te Aintree. Dit was die enigste wedren waarin hy sy spanmaat, vriend, mentor en teenstander by Mercedes, Juan Manuel Fangio uitgestof het. Daar word egter dikwels gegis oor die moontlikheid dat Fangio vir Moss op die laaste draai laat verbykom het sodat hy voor sy tuisskare kon wen.

Tydens sy loopbaan het Moss in verskeie motors gejaag, onder meer in 'n privaat Jaguar, vir Maserati, Vanwall, Lotus vir Cooper en dan ook vir die magtige Mercedes-Benz.

• Wikimedia Commons het meer media in die kategorie Stirling Moss.
• Sir Stirling Moss – amptelike webwerf
• Grand Prix History – Hall of Fame, Stirling Moss
• Sir Stirling Moss – President van die Brooklands Society Geargiveer 17 Januarie 2016 op Wayback Machine
• (en) Stirling Moss in die Internet-rolprentdatabasis