Mentewab

Mentewab
	Keiserin-gemalin van Ethiopië; Regent van Ethiopië
	Keiserin Mentewab lê voor Maria se voete by Nerga Selassie, Tanameer, 1748.
Dinastie	Huis van Salomo
Bewind	8 November 1723 - 19 September 1730
Gebore	c. 1706
Gesterf	27 Junie 1773 (op 66-67 jaar)
Gade van	Keiser Bakaffa
Kinders	Josua II, 3 dogters
Vader	Dejazmatsj Manbare van Dembija
Moeder	Woizero Jenkoi

Mentewab (Ge'ez: ምንትዋብ min-tiwwāb, "O, watter skoonheid!"; omstreeks 1706 - 27 Junie 1773) was keiserin van Ethiopië, die vrou van keiser Bakaffa, die ma van Josua II en ouma van Joas I. Sy was ook bekend onder haar doopnaam, Walatta Gijorgis (Ge'ez: ወለተ ጊዮርጊስ wälättä giyorgis, "Dogter van sint Joris"). Mentewab het baie invoed gehad tydens die bewind van haar seun en kleinseun.

Lewe

Mentewab is op 6 September 1722 met keiser Bakaffa getroud. Sy was sy tweede vrou nadat sy eerste vrou onder geheimsinnige omstandighede dood is op die dag waarop sy gekroon is.

Ná haar man se dood het Mentewab romanties by sy susterskind betrokke geraak. Die jong minnaar is "Melmal Ijasoe" ("Josua die Hou-man") genoem. Melmal Josua was self ’n prins van die Salomoniese Dinastie van keiser Bakaffa. Mentewab het drie dogters by hom gehad, onder andere Woizero Aster Josua, wat sou trou met Ras Mikael Sehoel, die magtige krygsheer van Tigray.

Mentewab se kasteel in Gondar, Ethiopië.

Keiserin Mentewab het verskeie belangrike geboue in Gondar laat bou, onder meer haar eie kasteel en ’n groot banketsaal.^[1] Sy het ook ’n kerk by Qusquam laat bou wat aan die Maagd Maria gewy is en ’n paleis wat aan die kerk grens. Dié was haar gunsteling-blyplek.^[2]

Mentewab is as medeheerser gekroon nadat haar seun, Josua II, die troon in 1730 bestyg het en het groot mag tydens sy bewind gehad. (Sy het self afgestam van keisers wat twee eeue tevore regeer het.) Haar poging om haar rol voort te sit ná haar seun se dood in 1755 het tot konflik gelei met sy weduwee, Woebit (Welete Bersabe), wat geglo het dit is haar beurt om toesig te hou oor die hof van haar eie seun, Joas (Mentewab se kleinseun). Die keiserin het haar familielede en hulle magte van Qwaran laat kom om haar te steun. Woebit het gereageer deur haar eie Oromo-familielede en hulle aansienlike magte van Yejju af te laat kom. Mentewab het ook die magtige krygsheer Mikael Sehoel laat kom om as middelganger op te tree in ’n poging om ’n bloedbad te keer. Toe hy in Gondar aankom, is hy Ras (goewerneur) gemaak. Mentewab het gehoop sy sou hom aan haar kant kry, maar in plaas daarvan het Ras Mikael die mag vir homself toegeëien. Hy het eindelik die jong keiser Joas I laat vermoor en met sy slagoffer se tannie (Mentewab se dogter) getrou.

Keiserin Mentewab was so hartseer oor haar kleinseun se dood dat sy haar in haar paleis by Qusquam teruggetrek het, waar sy haar kleinseun langs haar seun begrawe het. Sy het geweier om ooit weer na Gondar terug te keer en het tot met haar dood in afsondering in haar paleis gewoon.

Verwysings

↑ Donald N. Levine, Wax and Gold: Tradition and Innovation in Ethiopian Culture (Chicago: University Press, 1965), p. 26
↑ Paul B. Henze, Layers of Time, A History of Ethiopia (New York: Palgrave, 2000), p. 105

Skakels

Wikimedia Commons het meer media in die kategorie Mentewab.

Hierdie artikel is in sy geheel of gedeeltelik uit die Engelse Wikipedia vertaal.

[1] Donald N. Levine, Wax and Gold: Tradition and Innovation in Ethiopian Culture (Chicago: University Press, 1965), p. 26

[2] Paul B. Henze, Layers of Time, A History of Ethiopia (New York: Palgrave, 2000), p. 105

[1]

[2]