Lewendige as
'n Lewendige as, soms ook 'n soliede as of balkas genoem, is 'n tipe suspensiestelsel wat gebruik maak van die dryfaste (wat die krag oordra na die wiele) as suspensie. Die lewendige as verbind die wiele sydelings sodat hulle saam beweeg as 'n eenheid.
'n Lewendige as bestaan uit 'n sentrale ewenaar in 'n enkele hulsel wat met soliede syaste verbind is aan die dryfwiele. Die ewenaar is weer verbind aan die enjin via 'n swaaibare (op-en-af) dryfas en 'n universele koppeling. Die volledige montering kan tipies gesuspendeer word met bladvere, kronkelvere of lugsakke.
In kleiner vragmotors en viertrekbakkies is soliede voorasse oor die algemeen deur onafhanklike voorvering vervang.
Sommige lewendige asse gebruik sleeparms, semi-sleeparms, 'n Panhard staaf of 'n Wattskoppeling om die vertikale en laterale bewegings van die as te beheer. Ander, veral ouer voertuie, gebruik Hotchkiss vering, waarin die bladvere 'n hegpunt vir die as verskaf, asook vering of suspense bied.
Voordele
[wysig | wysig bron]Die hoofvoordeel van 'n soliede as is sy eenvoud. Die eenvoud maak dit baie ruimtedoeltreffend en relatief goedkoop om te vervaardig. Hulle word byna universeel gebruik in swaar vragmotors; die meeste ligte- en mediumgroot bakkies, sportnutsvoertuie en waens gebruik ook 'n soliede as, ten minste aan die agterkant. Lewendige asse het 'n belangrike voordeel vir off-road gebruik, omrede hulle beter voertuigartikulasie en duursaamheid in 'n hoë ladingomgewing bied. Die eenvoud maak dit ook betreklik maklik om 'n voertuig op te lig.
Nadele
[wysig | wysig bron]Die grootste nadeel is dat elke wiel nie toegelaat word om onafhanklik oor 'n hobbel of 'n klip te beweeg nie. Die massa van die samestel is deel van die ongeveerde massa van die voertuig, wat ritgehalte verder kan verminder. Ook die draaivermoë is tipies swakker as by ander veringontwerpe omdat die wiele 'n nul-wielvlughoek handhaaf gedurende bakrol.
| Hierdie artikel is in sy geheel of gedeeltelik vanuit die Engelse Wikipedia vertaal. |
