Andrius Kubilius

Andrius Kubilius
9de Eerste Minister van Litaue
Ampstermyn 9 Desember 2008 – 13 Desember 2012
President	Valdas Adamkus Dalia Grybauskaitė
Voorafgegaan deur	Gediminas Kirkilas
Opgevolg deur	Algirdas Butkevičius
Ampstermyn 3 November 1999 – 26 Oktober 2000
President	Valdas Adamkus
Voorafgegaan deur	Irena Degutienė (waarnemend)
Opgevolg deur	Rolandas Paksas
Leier van die Vaderlandsunie
Ampsbekleër
Termynaanvang 24 Mei 2003
Voorafgegaan deur	Vytautas Landsbergis
Persoonlike besonderhede
Gebore	8 Desember 1956 (1956-12-08) (67 jaar oud) Vilnius, Litause SSR, Sowjetunie (tans Litaue)
Politieke party	Vaderlandsunie
Eggenoot/-note	Rasa Kubilienė
Kind(ers)	2
Alma mater	Universiteit van Vilnius
Religie	Rooms-Katolieke Kerk

Andrius Kubilius (* 8 Desember 1956 in Vilnius) is 'n Litause politikus van die konserwatiewe party Tėvynės Sąjunga ("Vaderlandsunie"). Hy het tussen November 1999 en Oktober 2000 as eerste minister gefungeer en die tweede ampstermyn in hierdie amp het hy vanaf 9 Desember 2008 tot 13 Desember 2012 beklee.

Ná voltooiing van sy skoolloopbaan het Kubilius tussen 1974 en 1979 fisika aan die Universiteit van Vilnius gestudeer en was daarna tot in 1990 as universiteitsdosent werksaam.

Reeds tydens sy akademiese loopbaan het hy in 1988 by die Litause hervormingsbeweging Sąjūdis aangesluit en het tussen 1990 en 1992 as uitvoerende sekretaris van hierdie organisasie gefungeer. In 1992 is hy vir die eerste as afgevaardigde in die Litause parlement, die Seimas, verkies waarvan hy steeds 'n lid is. In Mei 1993 het hy Sąjūdis se regtervleuel verlaat om by die nuutgestigte party "Vaderlandsunie" (Tėvynės Sąjunga) aan te sluit waarvan hy sedert Mei 2003 ook die voorsitter is. Aanvanklik het Kubilius as parlementsleier van die "Vaderlandsunie" gefungeer en later – ná die konserwatiewe partye se oorwinning in die verkiesings van 1996 – eerste adjunkvoorsitter van die parlement geword. Hy het hierdie pos tot in 1999 beklee.

Op 3 November 1999 is hy ná die bedanking van die eerste minister Rolandas Paksas en 'n kortstondige oorgangsregering onder Irena Degutienė as nuwe eerste minister van Litaue verkies. Op 26 Oktober 2000 het hy bedank nadat sy party in die verkiesing van 8 Oktober 2000 'n verpletterende nederlaag gely en 61 van sy 70 setels in die Seimas verloor het..^[1] Hy is deur sy voorganger Paksas opgevolg.

Tussen 2005 en 2006 was Kubilius die opposisieleier in die Seimas. Ná die bedanking van die eerste minister Algirdas Mykolas Brazauskas op 31 Mei 2006 is Kubilius as die belowendste kandidaat vir die pos beskou, tog het uiteindelik Gediminas Kirkilas die amp van eerste minister beklee. Kubilius is vervolgens in 2006 as een van die adjunkvoorsitters van die parlement en as voorsitter van die Kommissie vir betrekkinge met die Europese Unie verkies.

In die verkiesings van 2008 is Kubilius weer as die "Vaderlandsunie" se topkandidaat aangewys en het na dié party se oorwinning (44 van 141 setels in die Seimas) saam met drie ander partye 'n koalisieregering gevorm. Op 28 November 2008 is hy met die stemme van sy koalisie asook ondersteuners uit die opposisiepartye met 89 van 141 stemme (en 27 teenstemme) vir 'n tweede ampstermyn as eerste minister van Litaue verkies.^[2] Kubilius is op 9 Desember 2008 as regeringsleier ingesweer.

• Biografie in rulers.org
• Biografie op die Seimas se webtuiste (in Litaus)
• Biografie op die "Vaderlandsunie" (Tėvynės Sąjunga) se webtuiste

Wikimedia Commons bevat media in verband met Andrius Kubilius.