Ambrose Dlamini

Ambrose Mandvulo Dlamini
Eerste minister van Eswatini
Ampstermyn 27 Oktober 2018 – 13 Desember 2020
Monarg	Mswati III
Voorafgegaan deur	Vincent Mhlanga (wnd)
Opgevolg deur	Themba N. Masuku (wnd)
Persoonlike besonderhede
Gebore	(1968-03-05)5 Maart 1968 Mbekelweni, Manzini-streek, Swaziland
Sterf	13 Desember 2020 (op 52) Milpark Hospitaal, Parktown, Johannesburg
Nasionaliteit	Swazi
Politieke party	Onafhanklik
Eggenoot/-note	Portia Thwala-Dlamini
Alma mater	Universiteit van Swaziland Hampton Universiteit

Ambrose Mandvulo Dlamini (5 Maart 1968 - 13 Desember 2020) was 'n Swazi-sakeleier wat as die tiende eerste minister van Eswatini gedien het vanaf Oktober 2018 tot en met sy dood op 13 Desember 2020.

Dlamini is in Eswatini se Manzini-streek gebore en het 'n graad aan die Universiteit van Swaziland en 'n MBA aan Hampton Universiteit behaal, waarna hy in die bank- en telekommunikasiesektore gewerk het. Sy loopbaan van meer as 18 jaar in hierdie sektore sluit in poste as besturende direkteur van Nedbank en as uitvoerende hoof van MTN Eswatini.

Na die dood van premier Barnabas Sibusiso Dlamini in 2018, is Dlamini deur koning Mswati III aangewys om hom op te volg. Hy was die jongste premier in die land se geskiedenis en het geen ervaring in die regering gehad nie. Sy werk in die regering het die besnoeiing van nie-wesenlike uitgawes ingesluit en planne beraam om die land se ekonomie te verbeter asook die gemak van sake doen. Hy was ook die hoof van die land se vigsraad.

Dlamini het aan diabetes gely,^[1] en is positief getoets vir COVID-19 tydens die Covid-19-pandemie in Eswatini op 15 November 2020. Hy is agt dae later in die hospitaal opgeneem nadat hy ligte simptome ondervind het.^[2] Hy is vroeg in Desember na 'n hospitaal in Johannesburg oorgeplaas maar sterf daar op 13 Desember op 52-jarige ouderdom weens komplikasies van COVID-19. Hy was die eerste staatshoof wat weens die pandemie in die amp gesterf het.