Costa do Sol

Die Costa do Sol (Sonkus) is 'n gewilde Brasiliaanse vakansiestreek in die noorde van die deelstaat Rio de Janeiro wat vanaf die bergrûens van die Serra da Tiririca oos van Niterói tot Arraial do Cabo strek. Die kusstreek se landskap word oorheers deur lang sandstrande, skiereilande met turkoois baaie en talle soutwater-strandmere wat tussen die kuslyn en die bergrûens van die binneland geleë is. Die laasgenoemdes het aan die Atlantiese kusstreek die bynaam Região dos lagos of "Meregebied" besorg.

Die flora in die sanderige kusgebied word oorheers deur die restinga, 'n Suidoos-Brasiliaanse bioom met grasse, kruie en klein struike met hoogtes tussen 1,5 en 2 meter digby die strande, en tropiese loofbosse met klein boomspesies (en hoogtes van maksimaal 15 m) in die aangrensende binneland. Die Engelse natuurkundige Charles Darwin is in 1832 deur 'n landgenoot, wat hier geboer het, uitgenooi om die plaaslike dier- en plantspesies te bestudeer. Sy beskrywings en waarnemings is in 1839 as Journal and Remarks gepubliseer (latere uitgawes van die werk het onder die titel The Voyage of the Beagle verskyn, met beskrywings van die Costa do Sol in die tweede hoofstuk).