龍牙

龍牙（英文：Dragon's teeth），又叫做龍齒或龍牙桩，係二戰時期使用嘅一種防禦工事。外型係多列角錐形，鋼筋混凝土構築嘅防禦堡寨。呢種係針對裝甲車、坦克車嘅防禦工事，可以同捷克刺蝟夾埋使用。係愛來阻止坦克車前進，一旦坦克車撞到咗龍牙，就會陷咗入去而喐不得其正。龍牙會令到坦克車頭趷起身、暴露咗車底出嚟，而容易畀啲炸藥攻擊^[1]。

最早嘅龍牙防禦工事，係 1923 年由瑞士總參謀部開發設置嘅，嗰時候啲材質就係鐵路鋼軌，體積約一公尺高，但好快被認為係抵抗唔到戰車嘅前進，因此 1941 年嘅時候就再造過，改用水泥製成三角形混凝土塊，瑞士人就稱佢哋做「三角朱古力」。

納粹德國喺 1938 年開始，用鋼筋水泥作為材料製造呢類工事，因戰車體積增長，因此體積亦持續加大。

龍齒一般係多排一組嘅方式布置，每排係間著咁擺，令到啲車直鏟唔到過去，布置嘅規格係：

• 1938 年型：闊 7.35 公尺、高 1 公尺、雙排布局、每排四格突出，可以阻到 20 噸以下嘅戰車
• 1938 年加強型：闊 19.35 公尺、五排布局。
• 1939年型：闊 13.45 公尺、三排布局，可以阻到 36 噸以下嘅戰車。

龍牙係由鋼筋加埋水泥建造嘅，由於需要掘地基，因此冇法喺後方啲工廠度製成；建造嘅時候，就喺設置防線嘅現場度，直接加鋼筋混凝土去鑄造完，鋼筋混凝土嘅密度係一立方公尺二點四噸（2.4 t/m³）。

呢種工事深入埋地底，係防止啲工兵會安炸藥破壞。不過由於佢實用，所以守護萊茵作戰嘅時候，反而成為德軍裝甲部隊嘅麻煩。喺瑞士係以軍事目的而保留啲龍牙，現代係轉咗做景點，畀人參觀，有啲龍齒因為提供地方畀生物住，就同樣就保留咗落來。