鹽同胡椒

鹽同胡椒即係食鹽同埋胡椒，係西方常用嘅調味料。鹽同胡椒喺煮嘢食嗰陣、之前或者之後都可以一齊加。鹽同胡椒可以用嚟吊味，好萬用，同好多食材都夾，唔會冚咗食材原味之餘，仲可以帶出更多風味，所以高級食材好興用鹽同胡椒調味，例如牛扒。

鹽同胡椒通常係分兩個樽仔裝^[1]，好多時都打孖喺餐廳出現，俾食客自己額外加味。裝住嘅胡椒可以係磨碎咗嘅胡椒粒、磨成粉嘅胡椒粉或者完全未磨嘅胡椒果粒，用嗰陣先磨。而鹽粗定係幼都有。鹽同胡椒好少撈埋一齊擺喺同一個樽仔^[1]，噉樣好難控制份量。