食客
食客，又叫做門客，係春秋戰國期間嘅一種職業，佢哋遊走喺唔同嘅國家，寄食喺唔同嘅諸侯、有錢人、官宦之家或者貴族等嘅上流社會人士嘅門下。當時嘅有錢或者有權力嘅人，尤其係諸侯同埋卿大夫，為咗進一步提升自己嘅政治影響力或者社會地位，會招收各國人才，養起佢哋，俾佢哋生活上需要嘅嘢，希望喺需要嘅時候，呢啲人可以幫手出謀劃策、奔走效力。最出名嘅係「戰國四公子」：魏國嘅信陵君、楚國嘅春申君、趙國嘅平原君、齊國嘅孟嘗君。呢四個都係出名禮賢下士嘅好老細，所以有大量嘅人才集結咗喺佢哋嘅門下。
來源
[編輯]食客嘅來源好雜，可以話三教九流，乜嘢人都有。雖然呢啲人多數都喺社會遊民，甚至係無家可歸、流落街頭嘅人。但係佢哋好多都有一技之長，就算乜都唔識，都可以奔走效力，出賣勞力，做下雜務，反正啲養得食客嘅貴族、諸侯同埋卿大夫，都係錢多、事多，需要好多人去辦啲雜務。
能力
[編輯]食客可以話係老細嘅私人下屬，佢哋無官職，唔係朝廷命官，亦都唔受國君指揮同埋使喚。佢哋對老細嘅貢獻同埋才能可以話係五花八門，佢哋可以係幫老細出謀獻策、出使遊說嘅幕僚，可以係幫老細負責唱歌跳舞、提供娛樂嘅人，亦可以係幫老細行刺、暗殺、做保鑣，甚至係偷呃拐騙，學動物叫。例如：根據《史記·卷七十五·孟嘗君列傳第十五》講嘅，齊威王嘅孫仔孟嘗君（田文），就係因為「食客數千人，無貴賤一與文等」而出名，佢好禮賢下士，佢嘅食客真係乜嘢人都有。
有啲食客，表面上冇乜嘢特長，不過到咗需要嘅時候，佢哋就大派用場。例如：公元1767年（乾隆三十二年）清高宗弘曆（乾隆帝）下令編修嘅《御批歷代通鑑輯覽》提過嘅朱亥，佢原本係一個豬肉佬，做魏國嘅食客，表面上佢冇乜技能。不過喺緊急關頭，佢老細信陵君需要「竊符救趙」嘅時候，佢就幫佢老細用大鐵錘打殺咗將軍晉鄙，救咗趙國。之後，佢隱居咗，到佢死咗之後，當地人起咗間廟去祭祀佢，叫佢做「朱仙」，仲將佢嘅鄉下改名做朱仙鎮。
地位
[編輯]喺戰國時代，大部分老細對門下嘅食客都好好，亦都好忍讓，目的係想吸引更多人才。例如，魏國嘅「屠客」朱亥，佢夠膽可以對魏王嘅細佬信陵君嘅幾次邀請都唔理；平民出身嘅荊軒，可以因為燕國嘅太子丹幾次催促佢早啲出發去秦國，而夠膽發老細脾氣，甚至好嬲咁當面鬧老細。