食人魔

食人魔（粵音：sik6 jan4 mo1），又有譯做巨魔（粵音：geoi6 mo1），係歐洲一種傳說中嘅怪獸，响童話同現代奇幻故事當中都不時出現^[1]。唔同小說或者影視作品對食人魔嘅描述都有啲唔同。一般嚟講，食人魔嘅樣同形狀會大致似人類，但生得異常咁高大而且好多時好肥，傾向好醜樣，大力得嚟又頭腦簡單^[2]。佢哋最大嘅特徵係中意食肉，尤其係中意食人類或者家畜嘅肉。

講到食人魔嘅故仔，幾乎實係用食人魔做奸角嘅，但係都會有部份嘅作品會將食人魔描繪成比較正面嘅形象，例子可以睇吓《史力加》呢套奇幻片噉。

食人魔嘅英文名叫 ogre，可借入粵語作粵拼：ou1 gaa4。乸嘅食人魔又有叫 ogress。

故仔通常會話食人魔棲息响啲山卡啦咁遠嘅地方，例如係陰暗嘅山窿、深山或者沼澤呀噉，如果有旅行嘅人類路過佢哋嘅住處，食人魔就會嘗試捉呢啲人嚟食。不過好出名嘅童話故事《著長靴嘅貓》又有講到好似貴族噉住喺城堡裡便嘅食人魔^[3]。

响外形上，食人魔通常生得異常咁高大而且仲好強壯，部份嘅作品可能會將佢哋描述做有成幾個大人咁高（可以睇返文頭嗰幅畫）。佢通常生得青面獠牙，亦有可能好肥有個大肚腩（因為食肉食得多）。啲人亦好興將食人魔描繪成係具有某啲「令人作嘔」嘅特徵，例如係皮膚上面生滿晒瘡，或者係個身散發住一陣陣汗或者死屍嘅臭味... 呀噉^[1]。

响行為上，食人魔最大嘅特徵係中意食肉，會捉人類或者家畜嚟食，好多時又會零舍中意食細路仔，例如童話故事《小手指公》嘅情節就有提到食人魔想捉班細路嚟食，但係班細路靠住機智逃離食人魔嘅魔掌。食人魔嘅其他常見特徵包括有「頭腦簡單」同埋「充滿攻擊性」等等^[1]。

英文 ogre 呢隻字，據講最先係借自 18 世紀嘅法國話嘅。法國童話作家沙略·佩羅响 1697 年已經有用到呢隻字詞^[4]，而且仲有證據指隻字詞可以再一路追溯到去 12 世紀嘅文學作品金碟故事（暫譯）嗰度^{[註 1]}：

"Et s'est escrit que il ert ancore

que toz li reaumes de Logres,

qui jadis fu la terre as ogres,

ert destruite par cele lance."

上面段字嘅大致粵譯如下：

「經文話佢會返嚟，

返嚟洛嘎斯嘅所有領域，

呢笪土地本來係屬於 ogre 嘅，

（佢）會用嗰把長矛摧毀佢哋（ogre）。」^{[註 2][5]}

多個出名嘅童話故事都有提到食人魔，例子有《著長靴嘅貓》、《小手指公》同埋某啲版本嘅《睡公主》呀噉。《著長靴嘅貓》講到身為主角嘅長靴貓用機智誅殺食人魔，係典型嘅「英雄打低食人魔」故仔^[3]。除此之外，亦可以睇睇《藍鬍鬚》—藍鬍鬚呢個角色嘅形象，被指係有啲似典型嘅食人魔。

現代嘅奇幻虛構作品亦成日會講到食人魔，例如係响廿一世紀初風靡全球嘅奇幻文學《哈利波特》、奇幻遊戲經典《龍與地下城》^[6]以及係 TCG 元祖《魔法風雲會》呀噉。奇幻片《史力加》亦幾受人注意，呢套戲以史力加呢隻食人魔做主角，講佢查實心哋唔壞，只不過係因為生得醜樣而受人誤解同排斥^[7]。

• 
  插畫：藍鬍鬚將條有魔法嘅鎖匙交畀女主角。
• 
  插畫：食人魔想捉細路嚟食。
• 
  2024 年响瑞士影到嘅一座雕像；座雕像描繪食人魔响度食細路仔。
• 
  插畫：都係畫食人魔想捉細路嚟食。
• 
  插畫：長靴貓同食人魔（坐响張櫈上面受人服侍嗰個）會面。
• 
  呢幅畫描繪惡鬼著住佛教僧人噉嘅衫—日本嘅惡鬼都係一種食人怪獸，被指係好似西方嘅食人魔。

• 巨人（約頓巨人）
• 仙子 · 矮人 · 高扁
• 食屍鬼 · 科學怪人
• 拿非利人 · 鎮尼

維基同享有多媒體嘅嘢：
Ogre

• 我哋啲食人魔肚餓啲㗎 （英文），電視橋段網講食人魔呢條橋段，以及係唔同嘅創作品點樣用呢條橋kiu2。