運算

  提示：呢篇文講嘅唔係計算或數學運算。

運算（粵音：wan6 syun3；英文：compute，動詞）係指涉及跟從一個定義好嘅模型、通過一連串算術同非算術步驟做嘅計算（廣義上可以包含任何由輸入俾輸出嘅過程）。呢啲計算可以係算術性嘅（加減乘除等），又可以係做邏輯代數嘅處理，中途會處理資訊。

運算嘅例子有演算法：行一段演算法嗰陣，一部電腦會接收用家俾嘅一串演算法，一段演算法包含一串有先後之分嘅指示，每行指示教部電腦做某啲計算，等等，通過行呢段演算法，部電腦會俾出一個輸出，如果段演算法設計得好而且部電腦無誤噉行好段演算法嘅話，個輸出正正會係個用家想要嘅結果^[1]。

舉個簡單例子說明，好似係以下呢段用粵文寫嘅演算法（虛擬碼）噉，就做咗一連串嘅運算^[2]：

要解決嘅問題：家吓俾一列正數（輸入）你，假設呢個列唔係一個空列，同我搵嗰列數入面最大嗰個出嚟。

用嘅演算法嘅步驟：

1. 設一個變數，叫佢做「max」，並且將佢個數值設做「0」；
2. 將收到嗰列正數逐個逐個攞嚟同 max 比較吓；
3. 如果撞到一個大過 max 嘅數（叫呢個數做「x」）嘅話，將 max 嘅數值設做 x，並且繼續將 max 同下個正數比較吓；（邏輯代數）
4. 將最後得出嗰個 max 嘅數值俾出嚟（輸出）。max 嘅數值會係成列數入面最大嗰個。

呢段演算法用 Python（1991 年出嘅一種程式語言）寫出嚟嘅話會係^[2]：

# Input：一列冧巴，叫列冧巴做「L」。
# Output：L 入面最大嘅冧巴。

def find_max (L):
   max = 0         # 設最大值做 0。
   for x in L:     # 同 L 入面每個元件做以下嘅嘢...
      if x > max:       # 如果 x 大過最大值...
         max = x         # ... 設最大值做 x。
   return max      # 做完嗮上述嘅嘢後，俾返個最大值出嚟。

研究運算嘅領域係電腦科學（CS），而運算理論係電腦科學一個高度理論化嘅子領域：電腦科學會研究運算嘅應用，研究點用電腦運算造出有經濟價值嘅產品同技術，例如電腦圖像學（CG）研究電腦圖像－用電腦嘅運算功能造圖像嘅技術，而呢啲圖像可以用嚟製作電腦動畫等嘅產品；但另一方面，電腦科學又會用好似數學噉嘅方法研究運算呢家嘢嘅本質－做呢啲研究嘅電腦科學子領域就係運算理論（theory of computation）^[3][4]。

• 運算理論
• 電腦科學
• 認知科學

• （英文） Theory of Computation at MIT.
• （英文） Theory of Computation at Harvard.