蔴雀
提示：呢篇文講嘅唔係麻雀。
蔴雀係一種源自中國嘅四人遊戲。呢隻遊戲好考技巧、策畧、智慧、計數同運氣。至於有幾多運氣成份，就要睇玩法。響東亞，打麻雀多數係賭。亦有唔少電腦電視電子遊戲係玩打麻雀。
歷史
[編輯]内文：麻雀史
麻雀前身叫「馬吊」，而「馬吊」就源自「葉子戲」。原本只係一副紙牌，但後嚟話說喺唔知邊個朝代，啲士大夫因為沉迷打蔴雀而荒廢朝政，搞到朝廷要下令禁止打麻雀，後嚟麻雀呢種遊戲傳咗去啲水上人度，因為水上人出咗海就唔怕朝廷禁令，但係喺船上面打蔴雀如果用紙牌唔單只容易濕仲好容易畀風吹走，於是就發展成而家嘅骨牌麻雀，之後麻雀解禁，又由水上傳返去陸上，麻雀就係咁由紙牌變成骨牌，一直流傳到而家。骨牌麻雀相傳係由一個叫陳魚門嘅寧波人改良而變成而家咁樣，由原本嘅「十字、萬字、索子、文錢四門」，變成只有「萬、索、筒」總共 108 張，又由於陳魚門係寧波人，寧波方言將麻雀讀為麻將，所以麻雀又叫做麻將，另外好似糊，原本係叫「和」，亦因為寧波方言原因而變成糊[1]，但日本仍然保留叫返做「和了」。而到咗現代，線上遊戲嘅普及，又令到呢種古老遊戲以另一個形式興起。
玩法
[編輯]麻雀有好多玩法，一副麻雀牌有 144 隻，開局嗰陣會砌成四方陣，所以好多時打麻雀叫攻打四方城。玩嗰陣每人係有 13 或者 16 隻。靠砌成特定組合而贏，而贏嗰陣就有 14 或者 17 隻。如果打打吓唔覺意少咗隻牌，咁就食唔到糊（除非可以靜靜雞出術揍翻啱數）。有啲人叫多咗隻牌嘅雀友做「大相公」，少咗隻牌者做「小相公」[2]。
參考
[編輯]
 |