肉骨茶

肉骨茶係一種東南亞（馬來西亞同新加坡）一帶流行嘅小食，之後亦廣傳於中國大陸、台灣、海外華人地區等地。

「肉骨」好似佢個名，係以帶肉嘅骨配合中藥煲成嘅湯。而「茶」字就係源自創始人個名「李文地」，因為賣肉骨湯而被顧客叫做「肉骨地」，福建話嘅「地」同「茶」音近，所以後來被叫做「肉骨茶」。小食本身並無茶葉。

肉骨茶混合中藥、香料（包括八角茴香、桂香、丁香、大蒜）同肉排熬製幾個鐘頭嘅濃湯。喺馬來西亞嘅一啲小鎮嘅餐館會加入海參同鮑魚一齊熬製。

肉骨茶通常伴白飯或以油炸鬼蘸湯來食。以醬油、碎紅椒同蒜蓉一齊調味。各類中國清茶通常會隨湯奉上，相信可以清走豬肉嘅油膩。喺馬來西亞，肉骨茶係一道典型嘅早餐菜式。

無從考究，但馬來西亞版本嘅由來據說係，清末時期，華人為咗逃離國家嘅動蕩不安，紛紛遠涉重洋來到咗南洋謀生計。嗰時嘅英屬馬來亞（即係今日馬來西亞嘅前身，英國殖民地），英國喺馬來亞搜刮咗好多嘅資源需要運送返英國，喺巴生（離首都吉隆坡30公里）起咗深水碼頭。當時唔少中國百姓由於知識水平唔高，來到馬來亞亦只能夠以勞動賺取人工。喺巴生河谷採挖「錫米」嘅華人，為咗維持長時間嘅體力消耗同適應熱帶地區嘅氣候，需要進補，但佢哋唔捨得買啲昂貴嘅中藥食譜。於是就用豬骨同一啲普遍常用嘅中藥，以及一啲家傳嘅偏方一齊熬成湯，呢個就係最早嘅肉骨茶。當時多來自福建泉州嘅中國人按照家鄉嘅習慣，將藥湯叫做「茶」。肉骨茶唔止好味、營養豐富，重提供所需嘅能量，更加可以抗風濕，又可以耐肚餓，一下就喺勞工間流傳起來。慢慢，肉骨茶就成咗新馬兩地人人鍾意嘅美食。新馬兩個版本係完全唔同，前面嗰種似乎係用肉骨煮藥膳，後面嗰種感覺似湯水多一啲。

隨住肉骨茶喺東南亞以至亞洲及世界各地流傳，佢嘅風格亦隨住當時當地嘅華人而有所影響。 常見嘅肉骨茶風味可以分為以下三種：

• 潮州派：又叫海南派，顏色較淺，不過啲湯會用比較多嘅胡椒，所以有較重嘅胡椒味；
• 福建派：又叫鶴佬派，顏色較深，因為會用比較多豉油做調味，所以有較重嘅藥材味；
• 廣東派：加入中國藥酒，以加強佢嘅藥效；

家陣喺新加坡，潮洲派較為盛行，而喺馬來西亞就以福建派較為盛行。

由於伊斯蘭教唔准食豬肉，肉骨茶喺馬來西亞亦出現咗「清真版本」，以雞肉取代豬骨，稱之為「雞骨茶」^[1][2][3]。而當豬流感爆發期間，由於當地居民因為疫情擴散而對豬肉恐慌，當地食店除咗改賣清真版本之外，甚至會用海鮮來取代豬肉，又或研發出「齋」嘅「肉骨茶」。