大紀元時報

《大紀元時報》係份報紙，喺2001年創刊，爾家用22種語言喺36個國家發行，其中好大篇幅都係用來批評中國共產黨嘅^[1]，又成日宣傳法輪功^[2]。佢嘅香港版本係當地政府電影、報刊及物品管理辦事處嘅註冊報紙之一^[3]，除咗有收錢賣同埋免費派嘅印刷版，重有網上版，一樣係收費同免費內容都有^[4]。

截至2020年11月12號，喺蘋果商店雜誌和報紙類別，大紀元iOS應用程式（Epoch Times: Live & Breaking）下載次數爬升至第一位，超越嗮之前領先，財雄勢大嘅《紐約時報》、《華爾街日報》同《華盛頓郵報》等等整嘅嘢，顯示讀者極多。^[5][6]

喺香港承印爾份報紙嘅新時代印刷廠，由成立至今，已經有五次被人惡意破壞。縱使有報警，不過時至今日，都無人落網。

一：2006年2月28號晚，間廠成立無幾耐，就有四條友闖咗入去，砸爛咗價值過百萬文，新買嘅印刷機。國際記者聯合會指責中共政府幕後操縱事件。

二、三：2013年5月，工廠鐵閘門鎖兩次被刑事毀壞。

四：有四個揸住類似警用短棍嘅黑衣蒙面人，喺2019年11月19號凌晨闖入去潑汽油放火。爛咗嘅有機器、印刷紙同報紙。《大紀元時報》指渠哋係中共歹徒。

五：2021年4月12日凌晨，四個蒙面男人揸鎚帶刀衝入去，靠揼嘢同灑紅毛泥碎，整爛機器，又搶走電腦零件，搞到印唔到《大紀元時報》，直到16日。份報紙話係中共買兇做嘅。^{[7][8][9][10]}

2020年6月12號晚，喺香港觀塘街上面，有個疑似係前民建聯社區幹事鄺星宇嘅白衣人，揸刀去斬開緊工嘅《大紀元時報》記者Jerry，畀個黑衣人徒手擋住，跟着刀手俾其他市民制服咗。黑衣人受傷流血，而記者雖然無中刀，但係佢嘅攝影架生就稍有損傷。^[11][12]

《大紀元時報》報道：2021年4月24號，有個該報記者梁珍唔識嘅男人（大廈看更查證件，記低嘅名係「廖［某］良」）去到梁屋企拍門揾渠，話受梁嘅外國程姓朋友所託，運樣好大嘅嘢畀梁。不過面對梁嘅查問，對方支吾以對，梁亦見唔到上述物件。同月26號下晝，梁去某舖頭採訪途中，察覺俾個可疑中佬叼住尾，又發現撇渠唔甩，於是邊用手機錄影，邊走埋去質問，對方先至逃走。喺27號晏晝，梁同同事吳雪兒一齊就上述兩單嘢報警。梁控訴兩次受滋擾嘅同時，又遣責《大公報》派人長期跟蹤渠，兼且話懷疑三者相關。翌月11號11點零鐘，喺何文田，梁一由居所行出街，就俾個喺道伏渠，大概高1.6米嘅黑衣男人用件睇落似壘球棍嘅武器，毆咗對腳幾十下，為時約莫一分鐘，後者跟着即刻上咗架接應嘅平治汽車閃人。之後，梁由白車載去醫院治療傍驗傷，亦報咗警。梁捱棍處又瘀又腫，所着嘅緊身褲爛咗。梁相信行兇嘅係中共特務，並且憶述，事發之前嗰兩個禮拜，有架私家車周不時停喺渠屋企樓下，每當梁浮頭就駛走，好可疑。^{[13][14][15][16]}

• 梁珍（女）
• 吳雪兒（女）
• 石山（男）
• 黃瑞秋（女）
• Maeve（女）
• Zac（男）

• 新唐人電視台
• 希望之聲