塵緣

《塵緣》係香港歌手羅文喺1988年推出嘅歌，由徐日勤包辦作編曲，有粵語同國語兩個版本，前者由林夕填詞；後者由娃娃填詞，係台灣古裝電視劇《八月桂花香》嘅主題曲。

徐日勤寫嘅旋律帶有少少中國味^[1]，編曲以合成器為主^[2]。

林夕按曲風同羅文嘅歌路去揾靈感，並用較抽象同面向大眾嘅角度描繪個人嘅經歷：聚散匆匆嘅大學宿舍生涯^[1]；但佢表示過唔太鍾意呢個填詞，因為填詞嗰陣計得太精密^[3]。隻歌收錄喺羅文嗰年3月出嘅粵語唱碟《塵緣》^[4]，1989年1月亞洲電視外購《八月桂花香》嗰陣都佢被攞嚟做主題曲。

羅文喺1987年尾開始開拓台灣市場，1988年8月被請做台視10月開播嘅《八月桂花香》演唱主題曲，並沿用《塵緣》嘅樂曲^[5]。筆名係娃娃嘅陳玉貞睇完《八月桂花香》嘅劇情大鋼後填詞^[6]，用咗淺白嘅文言^[7]。隻歌收錄喺羅文嗰年年尾出嘅國語唱碟《塵緣》。

詞評人黃志華認為林夕喺借景襯情度寫得幾好，歌詞境界「幽冷」^[3]。

評論人胡又天認為國語版曲、詞、演唱嘅風格「淡然和暢」；詞人用古典詩詞「香草美人」嘅筆法，去寫「一位有殘夢、有感悟的過來人」^[8]。音樂人陳樂融就讚賞歌詞尾句嵌入劇名，「暗」一字「展露了『流年幾度偷換』的高級無奈」^[6]。

粵語版攞到1988年無線電視勁歌金曲第一季季選獎^[9]，同埋上過香港電台中文歌曲龍虎榜一個禮拜冠軍^[10]。

國語版普遍被當做羅文嘅國語代表作，評論人管仁健又認為呢隻歌比《八月桂花香》流傳得仲廣^{[11] [12]}。