千年蟲
千年蟲，程式出錯一種，電腦程式因為當初慳位，搞錯2000年後日期，後果可以非常嚴重。蟲翻自英文個bug字，原指有隻蛾飛入電腦而計錯數，及後泛指程式出錯。千年蟲就為Millennium bug嘅對譯。亦有二千年問題個叫法。
早期電腦記憶體同磁帶磁碟，都好鬼貴，為咗慳位，只係用兩個數字位記年份，譬如1999年係「99」，咁2000年就會變咗做「00」或者「100」，有機會搞錯係1900年或者19100年，分分鐘令到程式行唔到，或者計到錯晒。喺該年之前，各家都趕住檢查同修正千年蟲。
原因
[編輯]呢個問題最先喺1960年被發現，因為電腦喺1946年發明兼喺1950年代開始喺美國部份行業應用。嗰時電腦啲儲存介質要好多錢先至買到，啲企業為咗慳成本而用咗㞘窿卡。而程序員格麗絲·梅莉·賀伯喺馬克一號入面設計咗用六位制嘅方式（YY/MM/DD）嘅方式嚟傳播，重俾COBOL喺1963年標準化咗。後嚟因為電腦技術發展得好快，儲存器嘅價錢降低咗好多，而六位制嘅方式一直成為咗歷史遺留問題。結果喺1990年年代尾陸續發現咗喺2000年時，日曆出現「掉頭返到1900年」嘅錯誤。嗰時由於全球各地啲政府同企業都用緊嵌入式系統，所以引起咗佢哋關注2000年時，電腦會唔會出現大規模故障。
實際上，踏入2000年1月1號之後，因為有好多電腦都換咗新系統，除咗一小部份系統出現報錯之外，其它行業啲日曆都未出過「掉頭返到1900年」嘅問題。
