兩德統一

  呢篇文章講嘅係1990年東德併入西德。想搵1871年普魯士建立德意志帝國嘅過程，請睇「德意志統一」。

兩德統一（德文：Deutsche Wiedervereinigung）係指1990年10月3號東德併入西德，令德國統一嘅事件。

波茨坦會議之後，同盟國開始佔領德國，將德國分裂咗做四個國家嘅佔領區，分別由美國、英國、法國同蘇聯佔領；德國首都柏林都俾分裂咗做四個國家嘅佔領區。而沙亞就成為咗一個法國管理嘅特殊保護領。原本四個佔領國都冇諗過要將德國分裂做兩個國家，但係隨著冷戰嘅開始西方國家同蘇聯嘅關係開始變差，四個佔領區合併做一個完整嘅德國經已變得冇可能。因此喺1949年5月，三個西方國家嘅佔領區合併咗做西德；而1949年10月東德喺蘇聯佔領區成立。西德係個資本主義國家，而東德就係個社會主義國家。^[1][2]