不信任動議

不信任動議 （英文：Motion of no-confidence）係一個議會用嚟表達對政府首腦或者內閣唔再信任嘅議案，認為佢哋唔應該繼續行使佢哋嘅職權^[1]。呢種動議係議會制嘅主要特徵之一，如果通過咗，就係代表個議會同政府嘅關係決裂。視乎個制度，有啲只係針對總統或者總理，而其他就係針對成個內閣。

雖然用途有啲似，但係不信任動議同譴責喺原則上並唔一樣。因為譴責一般都冇直接嘅後果，但係如果不信任動議通過咗，個首腦或者內閣係有可能需要落台嘅。當然，個政府亦都可以選擇反返轉嚟解散個議會，再搞過選舉。

根據英國嘅議會制，只要每年嘅撥錢草案失敗，基本上就會自動令個內閣辭職，搞新嘅選舉，同一個不信任動議差唔多效果。呢個情況叫做“Loss of Supply”。

喺英國國會，不信任動議一般會先做一份早期動議（英文：early day motion），而對於皇室演講（英文：Speech from the Throne）上面投票亦都被視為不信任動議嘅一種^[2]。不過，喺2011-2022年期間，根據2011年定期國會法令（英文：Fixed-term Parliaments Act 2011），只有明確講名嘅不信任動議先至會算數。到2022年，國會又通過咗2022年議會解散同召集法（英文：Dissolution and Calling of Parliament Act 2022）嚟推翻呢份議案。

雖然美國係用總統制，但係美國眾議院一樣有“清空議席動議”(英文：Motion to vacate the chair)，嚟踢走美國眾議院議長。第一次成功係針對當時嘅議長 Kevin McCarthy，而呢件事喺媒體報道都叫佢做“不信任動議”^[3]。

喺總統制，不信任動議本身嘅影響相對比較細，因為美國總統並唔會受到影響，而美國內閣都照正常運作。唯一嘅影響就係逼個議院重新選過個議長，令議長決定嘅立法政策有可能會變。

如果國會希望踢走總統或者內閣成員，就一定要通過彈劾嘅過程。但係，呢個過程一定要有犯罪嘅證明先至可以成立^[4]。

• 譴責
• 彈劾