動物
閱讀設定
動物界
| ||||
---|---|---|---|---|
物種分類 | ||||
|
動物,喺講嘢嘅情況之下,係指啲識得郁,生勾勾嘅嘢,唔包括人。喺生物學嚟睇,動物係生物嘅一類,又叫動物界(Animalia),包括人類。
動物身體嘅基本形態,會喺佢哋發育嗰陣變得固定,通常係早響胚胎發育嗰陣時。但亦有啲會響日後嘅生命裏面,有個形態轉變嘅過程,稱為「變態」。大多數動物係識郁嘅-能夠自發性咁自己移動。響生態上,動物係「消費者」-─意思係話,佢哋需要食其他生物(好似植物)嚟生存。
特徵
通常動物有幾種特徵,係與其他生物唔同嘅:
結構
一般嚟講,動物會有唔同功能嘅組織系統。呢啲組織包括肌肉(能夠收縮,控制身體移動)同神經組織(傳遞同接收訊號)。一般動物都會有個消化系統,同表皮連接一個或者兩個開口。有呢啲組織嘅動物,會稱之為「真後生動物」。
所有動物都會有真核細胞,形成甲殼、骨頭同針骨等等嘅結構。響發育嗰陣架構可以變化,令到細胞能夠進行組織,變得複雜。相對地,植物細胞會俾細胞壁固定住,發育會嚟得漸進。
繁殖
幾乎所有動物都係靠「有性生殖」嚟繁殖──有公同乸兩種。公產生精子,乸產生卵子。精子同卵子會結合,成為受精卵,之後發育成新嘅個體。
分類
根據唔同嘅準則,動物會有唔同嘅劃分。