金幣

金幣（粵拼：gam1 bai6）顧名思義係指用金造嘅銀仔。自古以嚟，金幣就成日都畀人攞嚟做貨幣嘅一部份，而到咗廿一世紀初，啲人時常都會買金幣，作為一種投資：金幣升值潛力可以好高，尤其係一啲限量版、發行預咗畀人攞去收藏嘅金幣；呢啲金幣經常會畀人攞去炒，買咗返嚟分分鐘可以用高過買價幾倍嘅價放返出去，例如美國金鷹幣就係噉。

投資用

2021 年嘅美國金鷹幣；個金幣上面印咗美國嗰句官方格言—
In God We Trust（粵譯：**我哋信任上帝**）

金幣係黃金投資其中一種最常見嘅形式：自從人類文明早期開始，黃金一路都係一種有價值嘅資產，成日畀人攞嚟做通貨；黃金嘅一種重要特徵係本身就有價值，唔似得銀紙噉—銀紙有價值係源於啲人信個經濟體，一旦啲人對個經濟體喪失信心，例如政府亂咁印銀紙，銀紙就可能會突然間冇晒價值；相比之下，金可以用嚟造首飾同埋電子元件等嘅物品，所以永遠都梗會或多或少有啲價值；除此之外，金又有個好處，就係市場流通度夠晒高，可以話放就放，唔似得例如房地產噉吓吓都要搞一排（例如約時間睇樓）先至放得到。而啲人要買黃金做投資，其中一種最常見嘅方法就係去銀行等嘅地方購買金幣。

不過，買金幣都有小心提防假嘢。一般認為，防範假金最簡單嘅方法，係淨係幫襯規模同名氣都有返咁上下嘅交易商：呢啲交易商往往有嚴格嘅基準檢驗自己買賣嘅金幣；而且喺正常情況下，交易商唔想假金搞到啲人對黃金失去信心—啲人對金失去信心唔肯買金，黃金交易商冇著數；因此，呢啲交易商有能力亦有誘因想確保自己啲金係真嘅^[1]^[2]。

攞嚟儲

儲銀仔顧名思義就係指緊一個人走去收集各種嘅銀仔。儲銀仔可以係純嗜好，亦可以係儲嚟預咗攞去炒賣嘅。儲開銀仔嘅人，基本上實會收集金幣，尤其係一啲限量版或者有紀念價值嘅金幣，佢哋仲會好擏惜（geng6 sek3）自己啲收藏品，務求想自己啲收藏品 kip1 住喺最佳狀態。

有歷史意義嘅金幣可以好有價值：有唔少金幣都有特製嘅圖案，紀念緊某啲歷史大事或者人物，啲人要賣走手上嘅紀念金幣嗰陣好多時都賺大錢—佢哋嗰個賣價可以係「熔咗個金幣啲金值嗰個價」嘅 1.8 倍咁多^[3]；而根據紀錄，喺 2021 年嘅美國有人攞咗一個出自 1933 年嘅雙鷹幣去拍賣，最後以 1,890 萬美金咁高嘅價成交，成為咗當時全美國最值錢嘅金幣^[4]。

簡史

金幣呢家嘢，喺公元前嘅時代已經存在。考古學家掘過公元前 6 世紀利底亞嘅文物—利底亞係西亞嘅一個古國，位置大致相當於現代嘅土耳其西部。當時嘅利底亞人已經有喺度用金幣，佢哋會用琥珀金（一種自然形成嘅金銀混合物；當中銀嘅含量最少有 20%）嚟整銀仔，可以算係原始嘅金幣^[5]。

東亞嘅金幣歷史都好久遠。早喺春秋戰國時代（西曆約莫公元前 770 年至 403 年）晚期，楚國已經有楚金版呢樣嘢。楚金版係一塊塊板或者餅噉形、刻咗啲文字喺上邊嘅金，用嚟做通貨，而且含金量仲非常之咁高—研究估計話，一塊楚金版有九成以上嘅重量都係金。證據顯示，當時嘅中國有廣泛噉使用楚金版—考古學家有喺湖北、湖南、安徽、陝西、河南、山東同江蘇等咁多唔同地方掘到楚金版^[6]。