貨幣供應

貨幣供應（英文：money supply）大致上係一個經濟體內部嘅錢嘅總量。

喺經濟學上，錢包含所有可以普遍用嚟做交易媒介嘅物件（睇埋錢）－包括咗銀紙、銀仔、銀行入面嘅活期存款、以至存在於電子空間嘅數碼貨幣（例子可以睇位元幣）呀噉。因為用得嚟做錢嘅實會係一啲易數嘅嘢，所以雖然呢啲物件喺物料上噉唔同，但做經濟分析嘅人可以用同一個單位計呢啲物件嘅價值（例：一張 10 文銀紙價值上等同 10 個一文銀，雖然銀紙同銀仔喺物理上好唔一樣）。一個經濟體嘅貨幣供應包含佢內部可以用嚟買貨品服務嘅錢嘅總數^[1]。