სასუმარო გრანდ ბუდაპეშტი

სასთუმარო გრანდ ბუდაპეშტი — 2014 წანას გიშულირი კომედიური ჟანრიშ ფილმი, ნამუშ რეჟისორი რე უეს ანდერსონი. სცენარს ანდერსონი მუშენდჷ ჰიუგო გინესწკჷმა ართო, ფილმიშ სცენარიშ იდეა თინეფქ შტეფან ცვაიგიშ რომანიშე ეჭოფეს.

ფილმის, რეიფ ფაინზი მუშ ალმახანდეწკჷმა (ტონი რევოლორი) ართო ოცად დანტკიცას მუშ უბრალებურობა, თიშენ ნამდა თინა ოთაკილჷნა მაჸვილარო.

ფილმიშ გინოღალაშო ფინანსეფიშ გოჩამა გერმანულ კინოკომპანიეფქ იდუდეს. თის გიშულაშე ხათეშე კრიტიკოსეფიშ ჯგირი ფასებაქ მაჸუნჷ დო დიდი მოწონა დეინალჷ. ფილმეფიშ BATFA დოჯილდაფაშ კონკურსის ფილმიქ 11 ნომინაცია (წანაშ საუჯგუშო ფილმი, საუჯგუშო რეჟისურა, საუჯგუშო არტისტი ქომოლკოჩი) დეინალჷ, მუთით თიქ შხვა მაკათური ფილმეფი დაორუ.

ფილმიქ მიღჷ ორქოშ გლობუსიშ ჯილდო ნომინაციას — საუჯგუშო ფილმი კომედიას ვარდა მუსიკაშ ჟანრის. ხოლო წჷმორინელი რდჷ ოსკარეფიშ დოჯილდაფაშ ცერემონიალს 9 ნომინაციას (თინეფ შქას: საუჯგუშო ფილმი, საუჯგუშო რეჟისურა). ფილმიქ დეინალჷ ოსკარიშ 4 ჯილდო — ბარგიშ დიზაინი, მაკიაჟი, პროდუქციაშ დიზაინი, მუსიკა.

სასაფულას რჩქინდუ ახალი ძღაბი, ნამუთ ჭარუშ მონუმენტიშ ოწოხოლე გერე. თინა იჭყანს ართართი დუდიშ კითხირს წინგიშე. უკული, ავტორი იჭყანს ამბეშ მოჸუნას, ნამუქჷთ თის აღოლჷ 1968 წანას სასთუმარო გრანდ ბუდაპეშტიშ სთუმარობას. სასთუმარო იდვალუაფჷ ზუბროვკიშ რესპუბლიკას (გუმოგონილი აკანი ცენტრალურ ევროპას), ნამუთ ჩოლირი რე ლჷმაშ დო უღვენობაშ გეშა. ახალი ჭარუ მიოგორუანს, ნამდა შორიშ გვალეფს დვალირი სასთუმარო, ართ ბორჯის რწკინჷნდჷ, ასე კრიზისული პერიოდი უღუ დო სთუმარით ჭიჭე ჸუნს. ავტორი აუხვადუ სასთუმაროშ ხანშა მიშულირ მინჯეს ზერო მუსტაფას, ნამუთ თის ოსერეშა დაპეჯენსჷ. მუსტაფა უწინს მუჭო გინირთჷ სასთუმაროშ მინჯეთ დო მუშენ ვაკო თიშ კილუა.

ამბე იჭყაფჷ 1932 წანას, სასთუმაროშ ჟინობუაშ პერიოდის. ზეროს შვეიცარიშ საღალე უკინებჷ. თინაქ გვალო ჭიჭე ხანიშ წოხოლე მორთჷ ზუბროვკაშა, თიშ უკული, მუთ თიშ ნოღაქ აკოციუ. ზერო დემაჸალებჷ აგათას, ნამუთ კვაჭი დო პროფესიონალი გაგესქუა რე. ზუბროვკა ლჷაშ პის რე, მარა საქვარს ჩერთებჷ მუსიე გუსტავ ეიჩი, ნამუთ აპონობაშ დიდორსანტი დო გრანდ ბუდაპეშტიშ შურ დო გური მოინალე რე. სასთუმაროშ მინჯეშ მინუობა უჩინებუ რე, თინა ხვალე უდუღორებუ გჷნაფას გამენს. თიშ მეტი, ნამდა გუსტავ ეიჩი მოინალეეფს მაჯღვერანს, თის ხოლო ობარ სასთუმაროშ „გილაკერზაფილი მოინალობაშ“ მოხვარა. თინა დიდარ დედიბეფწკჷმა ართო ირთუანდ დუდს. აკა მადამ დი, ნამუთ სასთუმაროშე შარობუაშ წოხოლენ სერს გუსტავწკჷმა ართო რე.

ართ თუთაშ უკული, გუსტავი გეგენს მადამ დიშ ღურაშ ამბეს. თინა ზეროწკჷმა ართო მეურს. მადამ დი-შ ნდობათ ეჭურული პიჯი დო ადვოკატი კოვაქსი დუნაჩინას კითხულენს, ნამუშე გიშურს, ნამდა გუსტავს ხვად გვალიან ზანდური ნახანტა „ბოში უშქურით“. ფანიაშ მაკათურეფი ოძღვირინანა. ართართი სქუა, დიმიტრი, დიდაშ ღურას გუსტავს ეკაწამენს. გუსტავი ზეროწკჷმა ართო იხირს ნახანტას დო ირთუ გრანდ ბუდაპეშტიშა, სოდეთ თის სეიფის იჩუანს. გუსტავი ზეროშ დეპიჯებჷ, ნამდა თიშ მონძე იჸი. ათაჸურეშე ჭიჭე ხანიშ უკულ, გუსტავს ეკაწამენა მადამ დიშ ჸვილუა, თის დახუნუანა სერჟ იქსიშ დანძალებათ ძირაფაშ გილანწყჷმაშ უკული.

ოხვილუშ რინაშ პერიოდის, გუსტავს ოშქურანჯ დჷმაშებუეფწკჷმა აკართჷ, მარა მუდგარენ ბორჯიშ უკული თინეფიშ პატიცემა დეინალჷ. გუსტავი ურაგადჷ ზეროს ნამდა მადამ დიშ ჸვილუაშ სერს თინა ვარდჷ თინაწკჷმა, მარა ვანტკიცებე. ზეროს მიარზიენს, ნამდა ინტას ოხვილუშე, თიშ მოხვარათ ნამდა თინა ფულირო მიოჭირინუანს სამუშა ანჯარეფს, ნამუსჷთ ზეროშ მაჸალე აგათა ცხურას ინოდვანს. დჷმაშებუეფიშ ბუნაწკჷმა ართო რამუსჷთ ლუდვიგით ოხოლ, თინეფ იჭყანა ბეტონიშ გონთხორუას. თინეფ ახერხენა ნტებას, მარა ყარულეფწკჷმა ბურსუას ღურუ ართართი თინეფშე, ლუდვიგი გუმეთხიებჷ გუსტავს დო ზეროს დო მუშ ბუნაწკჷმა ართო ავტობუსით ახერხენა ნტებას. გუსტავი ზეროწკჷმა ართო ოცადუ მუშ უბრალობაშ ნტკიცებას.

გუსტავს დო ზეროს მეთხოზ რგილზისხირამი მაჸვილუ ჯეი-ჯი ჯოპლინგი, ნამუთ დიმიტრიშ ინტერესეფს თხილანს. ჭიჭე ხანიშ წოხოლე თიქ ადვოკატი კოვაქსი დოჸვილჷ დო მარძგვან ხეს კითეფი მოკვათჷ, კოვაქსიქ დიმიტრიწკჷმა ალმახანდობა ივარუ. გუსტავი ურეკჷნს მუსიე ივანს, ჯვარული კილაშ კათაშ ართ-ართ მაკათურს, ნამუთ კათაშ შხვა მაკათურეფს ერსხუებ, დო თინეფ ართო ახერხენა გუსტავიშ მოხვარას. გუსტავი დო ზერო მეულა გვალაშ პიჯიშ მონასტერშა, სოდეთ ხვადუნა სერჟის, აკა ადამიერს, ნამუსჷთ შეულებჷ გუსტავიშ უბრალობა დანტკიცას, მარა სერჟის ჯეი-ჯი ჯოპლინგი ჸვილჷნს თეიშა, სოიშა თინა ოფულარ ინფორმაციას გოთქუანს. ზერო დო გუსტავი იხირა ჯამბურიას დო მეთხოზჷნა ჯოპლინგის, ნამუთ ჯამბურიეფით მისინტ. თხოზინიშ ბოლოს, ზერო კირდეშ პის მიკობუნაფილ გუსტავს გინასქილიდუანს, ჯოპლინგის ხეს გეჸურაუანს, თინა გერსამიას ქინოლჷ.

გრანდ ბუდაპეშტის სიტუაცია უძგალაშო გერსხიპინაფილი რე. სასთუმაროს ჯარიშკოჩეფი აკონტროლენა დო თიშ კაზარმათ გინოკეთება ოკონა. გურგოტახილი გუსტავი იფუჩუანს, ნამდა მეტშა ანწი ვემიოტენს სასთუმაროს. ზეორს დო გუსტავს აგათა აკათუ, თინა ყარულეფს ნახანტიშ თხილუას ოცად, მარა ათე ბორჯის რჩქინდუ დიმიტრი, ნამუთ ოხვილუანს აგათას. იჭყაფუ საართო ჸოთამა ართიანიშ ჸურე. ზერო დო აგათა ნახანტით ხეს ერია-მორიაშე დუს გიშეღანა. საბოლათ გუსტავიშ უბრალობა ინტკიცებჷ, მუჟამსჷთ მადამ დიშ მაჟირა ოშინუშ ამნახატის მიოგორუანა, ნამჷთ თიშ მერეხუაშა სერჟიქ ქოღოლჷ, უკული სურათიშ უკახალე დატყობინუ. ათე ოშინუ ნძალას მიშეშჷ ხვალე მადამ დიშ ნძალებური ღურაშ მოხვალამას. ოშინუშ განჩინებათ ირკვიებჷ ნამდა გრანდ ბუტაპეშტიშ მინჯე წორას მადამ დი რდჷ. თიქ მუშ ღვანაშ უმენტაში ნორთი გუსტავს დუტუ, ნახანტიშ დო სასთუმაროშ სახეთ. გუსტავი სასთუმაროშ ოდუდალეს გერდჷ, თეიშა სოიშა თინა ზეროქ ვათირუნ. ზეროქ დო აგათაქ დეგურგინეს.

ლჷმაშ უკული, ქიანა შხვა სახენწიფოქ მირსხჷ. მახინწალით შარობუას, ხურგაწკჷმა ხოლოს, ოურდუმეეფი გუსტავიშ დო ზეროშ საბუთეფს ამორსენა. გუსტავი დო ზერო აწუდირთუნა, ართართ ჯარიშკოჩის ოკო ზეროშ დოხუნაფა, თიშენ ნამჷდა თის იმიგრანტიშ სტატუსი უღუ. ათაჸურეშე ჭიჭე ხანშა აგათაქ დო თიშ წყარბაღანაქ სქუა ჩხე-ჩხურუთ დოღურეს. ზეროქ გუსტავიშ მონძექ იყუ, თიქ დიფუჩუ, ნამდა ბოლომშა გრანდ ბუდაპეშტიშ შურ დო გური იჸიდჷ. უკულიანი რევოლუციაშ უკული ზუბროვკაქ გეღარიბეს. ზეროშ გინოგაფურეფქ მიძინეს, თიქ სასთუმარო ნორთობულო თარობას დაუთმჷ, კილუაშე გინუსქილუაფუდესკონ.

უკახალე 1968 წანას, ნახანტი, ნამუშოთ ზერო დო გუსტავი იბურსუნან, სასთუმაროშ კიდალას მიკობჷ, გილართელი დო გოჭყოლადირი. მუსტაფა ჰოიას რაგადანს, ნამდა ნანდული სამანჯელი, მუშ გურშენ ტის ვადატებე სასთუმარონ, რე "თი ოქიანუ", ნამუსჷთ თინა, გუსტავი დო აგათა ოხორანდეს, ათე ეკონია ღოზი რე, ნამუთჷთ ჯვეშ გუნაშინას ერსხუებჷ, საუჯგუშოშ თიშ რინას. თინა ფირქენს, ნამდა გუსტავიშ ოქიანუ დიდი ხანიშ წოხოლე აკირღჷ დო სასთუმაროშ მუშ ჯვეშ დიდებაშ ხვალე ოროქ ასქიდჷ. ავტორი მეურს ობჟათე ამერიკაშა დო დღას ვადირთუ სასთუმაროშა.

1985-ს, ავტორი ათენს ამბეშ მოჸუნას მუშ მოთაშ ოწოხოლე.

ასეიან ბორჯის, ავტორიშ სკულპტურაშ წოხოლე გემარენჯი ახლი ძღაბი ათენს წინგიშ კითხირს.

2013 წანაშ 13 გჷმათუთას ჩინებულქ იჸუ, ნამდა ფილმი 2014 წანაშ 7 მელახის გიშეშჷ. 2014 წანაშ ფურთუთას, ბერლინიშ ოერეფოშქაშე ფილმეფიშ ფესტივალქ წორო ათე ფილმით გინწყჷ, სოდეთ თინა ჟიურქ გრანპრით - ვარჩხილიშ თუნთით დაჯილდუ.

• რეიფ ფაინზი - მუსიე გუსტავ ეიჩ
• ტონი რევოლორი - ახალი ზერო მუსტაფა
• ედრიენ ბროუდი - დიმიტრი დესგოფ
• უილემ დეფო - ჯეი.ჯი. ჯოლინგ
• სირშა რონანი - აგათა
• ედვარდ ნორტონი - ინსპექტორი ალბერტ ჰენკელს
• მატიე ამალრიკი - სერჟ იქს
• ჰარვი კეიტელი - დუნახუნა ლუდვიგ
• ფარიდ მარი აბრაამი - ხანშა მუშულირი ზერო მუსტაფა
• ჯუდ ლოუ - ახალი ავტორი
• ტომ ვილკინსონი - ხანშა მიშულირი ავტორი
• ლიი სეიდუ - კლოტილდა
• ჯეისონ შვარცმანი - მუსიე ჟან
• ტილდა სუინტონი - მადამ დი
• ოუენ უილსონი - მუსიე ჩაკ
• ბილ მარი - მუსიე ივან
• ჯეფ გოლდბლუმი- მილო კოვაჩი
• ბობ ბალაბანი - მუსიე მარტინ
• ფიშერ სტივენსი - მუსიე რობინ
• ვოლეს ვოლოდარსკი - მუსიე ჟორჟ
• ორის ალუვაია - მუსიე დინო
• ფლორიან ლუკაში - დუნახუნა ფინქი
• კარლ მარკოვიცი - დუნახუნა ვულფ
• ვოლკერ მიჩალოვსკი - დუნახუნა გიუნტერ
• ნილ ჰაფი - ლეიტენანტი
• ლარი პაინი - მისტერ მოშერ
• დენიელ შტაინერი - ანატოლი

• ოფიციალური ვებ-ხასჷლასასუმარო გრანდ ბუდაპეშტი — კინოფილმეფიშ ინტერნეტ მუნაჩემეფიშ ბაზას (ინგლისური)
• სასუმარო გრანდ ბუდაპეშტი — TCM-იშ მუნაჩემეფიშ ბაზას
• სასუმარო გრანდ ბუდაპეშტი — Box Office Mojo-ს
• სასუმარო გრანდ ბუდაპეშტი — Rotten Tomatoes-ს
• სასუმარო გრანდ ბუდაპეშტი — Metacritic-ს