Immen/An de Dütschen

Veel hett de Dütschen dahn — doch mehr eledden;
   Kein fint — sei sülwest hett sik owerwunnen;
   Sik sülwest hett de dütschen bräuder schunnen,
Hett nich for sik — for andre man estredden;

Sau kummt et wedder nu — ik will drop wedden, —
   Hett sei nich bäter balle sik besunnen;
   Doch denne bläuet ewig öre wunnen
Un't vaderlant is nimmermehr te redden.

Dat hilpet nich — eklaget un eswöget,
   Edrömmet gar noch bin trumpeitenschalle,
Et oge natt, de harten utedröget!

De släper wekkt de degen balle — balle;
   Dei sieget man, dei freuh enaug sik röget;
Blint geiht de drömmer in de slue falle.